चीनबाट इन्धन लिन ट्यांकर रसुवा आइपुगे
रसुवा — सहुलितको पेट्रोलियम पदार्थ लिन नेपाल आयल निगमको एक दर्जन भन्दा बढी ट्यांकर शुक्रबार दिउँसो जिल्ला प्रवेश गरेको छ । ती ट्यांकर शुक्रबार सीमा टिमुरेमा रहने छन् । भोलि शनिबार बिहान २२ किलोमिटर टाढा चीनको केरुङबाट तेल भर्ने छन् ।
चीनले पनि शनिबार तेलका ट्यांकर केरुङ झार्ने छ । 'ट्यांकर आइसकेको छ,' प्रमुख जिल्ला अधिकारी शिवराम गेलालले भने । काठमाडाैंबाट अाइपुगेका ट्यांकरका चालक र सहचालककाे नागरिक समाज धुन्चेले स्वागतकाे तयारी गरेकाे नागरिक समाजका अध्यक्ष बाबुलाल तामाङले बताए ।
पेट्रोलियम पदार्थ लिएर चिनियाँ ट्यांकर पनि सिगात्सेबाट केरुङ आउँदै छन् । पेट्रोलियम पदार्थ लिनका लागि आयल निगमका निर्देशक दीपक बराल, नेपाल पेट्रोलियम डिलर्स नेसनल एसोसिएसन र पेट्रोलियम ढुवानी व्यवसायी महासंघको टोली सीमा रसुवागढी पुगेका छन् । नेपाल पेट्रोलियम डिलर्स नेसनल एसोसिएसनका अध्यक्ष लीलेन्द्रप्रसाद प्रधानले पेट्रोलियम पदार्थ ल्याउने सडक ठीकै रहेको बताए ।
रसुवाको धुन्चे आइपुगेको ट्यांकर । कृष्ण थापा/कान्तिपुर
शनिबार चीनका लागि नेपाली राजदूत महेश मास्के, ल्हासाका लागि नेपाली महावाणिज्यदूत हरिप्रसाद बस्याल र चिनियाँ राजदूतले शनिबार सीमा मितेरी पुलमा तेल हस्तान्तरण गर्ने छन् ।
चिनियाँ एक ट्यांकर बराबर नेपालको दुई ट्यांकर पेट्रोलियम पदार्थ हुन्छ ।
चीनले एकहजार मेट्रिकटन पेट्रोल रसुवागढी नाका हुँदै नेपाल सरकारलाई दिने भएको छ । उक्त पेट्रोलियम पदार्थ थानकोटस्थित भण्डारण कक्षमा जम्मा गरिने छ ।
इन्धन खरिद सम्झौता पत्रमा डिजेल, मट्टितेल र ग्यास दिनेबारेमा शुक्रबारसम्ममा बेइजिङमा रहेका नेपाली पदाधिकारीको टोलीले विस्तृत जानकारी दिने निमित्त कार्यकारी निर्देशक नागेन्द्र साहले बताए ।
बुधबार साँझबाट वर्षासँगै शुक्रबार दिउँसो पनि केरुङमा हिउँ परेको छ । उच्च हिमाली भेगमा हिमपात अझै जारी छ । छिट्टै नेपाली ट्यांकरले पेट्रोलियम पदार्थ केरुङबाट उठाउनु पर्ने छ ।
बिहान काठमाडाैंबाट ट्यांकरहरु बिदा गरिएको भिडियो हेर्नुहोस्
प्रकाशित : कार्तिक १३, २०७२ १५:५०