भरतपुर विद्युत् सबस्टेसन र प्रसारण लाइन सञ्चालनमा

हेटौंडा–भरतपुर–बर्दघाट १४७ किमि प्रसारण लाइनमा भरतपुर र हेटौंडामा सबस्टेसन रहनेछन् । २२० केभीको यो प्रसारण लाइनमा भरतपुरदेखि पूर्व–पश्चिम दुवैतर्फ एक/एक हजार मेगावाट बिजुली प्रवाह हुनेछ । मर्स्याङ्दी र यसका सहायक नदीहरूबाट एक हजार ६ सय मेगावाट बिजुली उत्पादन हुन सक्ने सम्भावना छ ।

‘हेटौंडा–भरतपुर–बर्दघाट प्रसारण लाइनमार्फत मर्स्याङ्दी बेसिनमा उत्पादित विद्युत् हेटौंडा, भरतपुर, बर्दघाट तथा काठमाडौंसम्म प्रवाह हुन सक्ने भयो,’ मर्स्याङ्दी करिडोर २२० केभी प्रसारण लाइन आयोजना प्रमुख नारायण रेग्मीले भने । तीन वर्षअघि सम्झौता भएर काम पूरा भएको आयोजनाको निर्माण लागत एक अर्ब ५२ करोड रुपैयाँ थियो ।

हेटौंडा–भरतपुर–बर्दघाट २२० केभी प्रसारण लाइन तथा सबस्टेसन आयोजनाको कुल निर्माण लागत ५ अर्ब ९४ करोड रुपैयाँ रहेको प्राधिकरणका उपकार्यकारी निर्देशक दीर्घायुकुमार श्रेष्ठले बताए । यो आयोजना भने निकै लामो समय लिएर तयार भएको हो । सन् २०१० मा सुरु भएको आयोजना निर्माण समयमै नसकिएपछि निर्माण व्यवसायीसँग सन् २०१७ र २०१९ मा सम्झौता रद्दसमेत भएको थियो ।

मकवानपुर, चितवन र नवलपरासी (बर्दघाट सुस्ता पूर्व र पश्चिम) का १२ पालिका भएर जाने प्रसारण लाइनका ४७२ टावरमध्ये ६६ वटा निजी जग्गा र बाँकी टावर वन क्षेत्रमा छन् । नेपालको विद्युत् उत्पादन क्षमता बढ्दै गएका कारण प्रसारण र वितरण प्रणालीलाई पनि दुरुस्त राख्न सरकारले काम गरी रहेको प्रधानमन्त्री दाहालले जनाए । आन्तरिक खपत कम हुने भएका कारण बिजुली व्यापार बढाउने पनि उनको भनाइ छ ।

२५/४० वर्षसम्म देशभित्र खपत बढाउन निकै कठिन रहेका कारण नेपालको बिजुली भारत र बंगलादेशका साथै चीनमा पनि बेच्ने योजना बनाएको उनले बताए । भारततिर अन्तरदेशीय प्रसारण लाइन बनिरहेको र नेपालमा बढी हुँदा भारतमा बेच्ने र नेपालमा कम हुँदा भारतबाट किन्ने क्रम सुरु भइसकेको उनले जनाए ।

हालै भारत भ्रमणमा जाँदा १० वर्षभित्र १० हजार मेगावाट बिजुली बेच्ने सम्झौता भए जसरी अब चीन भ्रमणमा जाँदा पनि विद्युत् व्यापारका विषयमा छलफल हुने प्रधानमन्त्री दाहालको भनाइ छ । ‘केही समयपछि म चीन भ्रमणमा जाँदै छु । चीनतिर व्यापार गर्न पनि अन्तर्राष्ट्रिय प्रसारण लाइन बनाउने तयारी छ,’ दाहालले भने ।

नेपाल, बंगलादेश र भारतबीच त्रिपक्षीय सैद्धान्तिक समझदारी बनेका कारण नेपालको बिजुली बंगलादेश बेच्ने बाटो पनि खुलेको उनले जनाए । १० हजार आठ सय मेगावाट बिजुली उत्पादन हुने सम्भावना रहेको कर्णाली चिसापानी आयोजना बने बिजुलीमार्फत देशमा समृद्धि आउने दाहालको भनाइ छ ।