गान्धीजीको निधन भो । कसैले भने, ‘राष्ट्रपिताको मृत्यु भो’; कसैले ‘विश्वको नै प्रकाशस्तम्भ ढल्यो’ पनि भने । अंग्रेजहरूले भने, ‘हामीले आफ्नो जातिको सबभन्दा ठूलो मित्र गँवायौं’; अमेरिकीहरूले यसमा अर्को विश्वव्यापी युद्धको खतरा देखे । जिन्नाले भने, ‘हिन्दूहरूका ठूला नेता मरे’; मुस्लिम जनताले कराई भन्यो, ‘हाम्रा सबभन्दा ठूला त्राता खोसिए ।’ हामी नेपालीले के भन्ने ? गान्धीजीको मृत्युले भरखर पलाउन लागेको नेपाली जनआन्दोलनको कत्रो ठूलो क्षति भो, त्यो हामीले नेपाली जनतालाई के गरी बताउने ?
