त्रिविका कामु उपकुलपति भन्छन् : विश्वविद्यालयले जागिर खोज्दै हिँड्ने कुरा भएन !

काठमाडौंमा मंगलबार आयोजित ‘कान्तिपुर एजुकेसन सम्मिट- २०८०’ को दोस्रो सत्र ‘नेपालमा गुणस्तरीय उच्च शिक्षा कसरी ?’ मा बोल्दै कामु उपकुलपति भुसालले विद्यार्थीहरूका रोजगारीसम्बन्धी असन्तुष्टि जायज रहे पनि यसमा विश्वविद्यालय एक्लैले समाधान गर्न नसक्ने आशय व्यक्त्त गरे ।

‘पराम्परागत शिक्षण मोडल, रोजगारी अभाव, शैक्षिक पात्रोसम्बन्धी विद्यार्थीका गुनासा सुनियो,’ उनले भने, ‘यो विश्वविद्यालयभन्दा पनि श्रम बजार, समाज र राज्यसँगै जोडिएका कुरा हुन् । विश्विविद्यालयले जागिर खोजिदिएर हिँड्ने कुरा भएन !’

शैक्षिक कार्यक्रमहरूमा विभिन्न समस्या रहेको स्विकार्दै भुसालले यसमा सुधारका प्रयास भइरहेको दाबी गरेका छन् । समयमै परीक्षा हुने, नतिजा प्रकाशित हुनेजस्ता विषयबारे शैक्षिक पात्रोको माग हुने गरे पनि त्यो मात्र समाधानको उपाय नरहेको कामु उपकुलपती भुसालको अनुभव छ । ‘आईओएममा शैक्षिक पात्रो उपलब्ध छ तर त्यहाँ परीक्षा सार्न दबाब आइरहेको म सुन्दै छु,’ उनले भने, ‘हामीले सयमै नतिजता प्रकाशन गरेका उदहारण छन् तर त्यसबारे चर्चा हुँदैन । ढिलो गरिएमा गुनासा आउँछन् तथापी हामी सुधार गर्दै छौं ।’

यसअघि शिक्षक-प्रधान पठन-पाठन परिपाटी रहेकोमा हाल त्यसमा पनि परिमार्जन गरिँदै आएको उनले जानकारी दिए । शिक्षणलाई सूचना प्रविधिमैत्री बनाउनेदेखि शिक्षकलाई चार महिनाको 'प्याकेज्ड' तालिम दिएर मात्रै कक्षा कोठमा पढाउन पठाउने लगायतका प्रयास गरिएको कामु उपकुलपती भुसालको भनाइ थियो । ‘शिक्षकलाई पनि अहिले चुनौती नै छ,’ उनले भने, ‘विद्यार्थी शिक्षकभन्दा स्मार्ट भइसकेका छन् । तसर्थ हामीले शिक्षणलाई सूचना प्रविधिसँग जोड्दै लगेका छौं । शिक्षक, विश्वविद्यालय दुवैले मेहनत गरिरहेका छौं ।’