टाहाखेलमा प्रथम उपत्यकाव्यापी मेयर कप सुरु
ललितपुर — गोदावरी नगरपालिकामा प्रथम उपत्यकाव्यापी अन्तर पालिका खुला मेयर कप फुटबल प्रतियोगिता शनिबार सुरु भएको छ ।
नगरपालिका–१० टाहाखेल–झ्यालुनटारमा अवस्थित गोदावरी बहुउद्देश्यीय रंगशालाको मैदानमा महालक्ष्मी नगरपालिकाले आयोजक गोदावरी नगरपालिकाको ए टिमलाई पेनाल्टी शुटआउटमा ४–२ गोलले हराएको थियो ।
महालक्ष्मीका सिद्धान्त अधिकारी, निशान राउत, सरोज राई र निशान बस्नेतले गोल गरे । गोदावरीका सुवास तामाङ र सायर तामाङले गोल गरे । गोदावरीको सुरुआती दुई पेनाल्टी गोलमा परिणत हुन सकेन ।
नीराजन मर्हजन र वाङ्गेल लामाले हानेको बलले जाली चुम्न सकेन ।
दुई पेनाल्टी रोकेका महालक्ष्मीका गोलकिपर आर्यन मर्हजन म्यान अफ द म्याच भए । उनले ५ हजार रुपैयाँ पुरस्कार पाएका छन् ।
यसअघि निर्धारित ९० मिनेटसम्मको खेल बराबरी भएपछि खेलको निर्णय पेनाल्टी शुटआउटबाट भएको थियो ।
सेमिफाइनल प्रवेशका लागि वैशाख २१ गते महालक्ष्मीले दक्षिणकाली नगरपालिकासँग प्रतिस्पर्धा गर्नेछ । दक्षिणकाली सिधै बाई पाएर क्बाटरफाइनलमा पुगेको हो ।
उपत्यकाभित्रका १४ वटा पालिकाका १५ टिमले यो प्रतियोगितामा प्रतिस्पर्धा गर्दै छन् ।
नवनिर्मित झ्यालुन्टार खेल मैदानको पूर्वप्रधानमन्त्री एवं कांग्रेस सभापति शेरबहादुर देउवाले उद्घाटन गरेका थिए । गोदावरी नगरपालिका बी टिमले बैशाख १९ मा ललितपुर महानगरपालिकासँग खेल्नेछ ।
विजेताले ५ लाख र उपविजेताले ३ लाख रुपैयाँ पुरस्कार पाए । अनुशासित टिमलाई ५० हजार र उत्कृष्ट गोलकिपर, डिफेन्डर, फरवार्ड, सर्वाधिक गोलकर्ता र उत्कृष्ट प्रशिक्षकलाई जनही २५ हजार प्रदान गरिनेछ ।
प्रतियोगितामा काठमाडौंका ८ स्थानीय तहको ८ टिम तथा ललितपुरको ५ स्थानीय तहको ६ टिम रहेको छ । भक्तपुर जिल्लाको एक टिम गरी १५ टिमको सहभागिता छ ।
प्रकाशित : वैशाख १५, २०८१ २१:५१