क्रिकेटसँगै एसियाली खेलकुदमा पदक विजेता खेलाडी पुरस्कृत

गत वर्ष आईसीसी ट्वान्टी–२० विश्वकप एसिया क्वालिफायरमा दोस्रो हुँदै नेपाल छनोट भएको थियो । त्यसबापत सरकारको कार्यविधिअनुसार खेलाडीले जनही १३ लाख पाउनुपर्ने हो ।

रोहितकुमार पौडेल (कप्तान), कुशल भुर्तेल, आसिफ शेख, अविनाश बोहरा, कुशल मल्ल, विवेककुमार यादव, सोमपाल कामी, दीपेन्द्रसिंह ऐरी, गुलसन झा, करण केसी, सन्दीप लामिछाने, सन्दीप जोरा, प्रतिश जीसी, ललितनारायण राजवंशी र विनोद भण्डारीले जनही १३ लाख रुपैयाँ पुरस्कार प्राप्त गरेका छन् । मुख्य प्रशिक्षक मोन्टी देसाईले ३ लाख ९० हजार, सहायक प्रशिक्षक वसन्त शाही, व्यवस्थापक सुमनराज कार्की र फिजियो विक्रम न्यौपानेले समान १ लाख ९५ हजार रुपैयाँ पाएका छन् । नेपाली खेलकुदमा अहिलेसम्म एउटा खेलले सरकारबाट प्राप्त गरेको यो सबैभन्दा ठूलो पुरस्कार रकम हो । नेपाल क्रिकेट संघका सचिव तथा पूर्वकप्तान पारस खड्काले सरकारबाट प्राप्त यस पुरस्कारले खेलाडी र समग्र क्रिकेटको मनोबल बढेको स्मरण गराए ।

युवा तथा खेलकुद मन्त्रालयले क्रिकेटसँगै एसियाली खेलकुदमा पदक जितेका खेलाडीलाई पनि पुरस्कार प्रदान गरेको थियो । चीनको हाङचाउमा भएको १९ औं एसियाली खेलकुदमा ऐतिहासिक रजत जितेकी कराते खेलाडी एरिका गुरुङलाई १९ लाख ५० हजार रुपैयाँ प्रदान गरियो । प्रमुख प्रशिक्षक कुशल श्रेष्ठले २ लाख ३४ हजार तथा सहायक प्रशिक्षकद्वय छोरी डंगोल र वीरकृष्ण शाहीले ७८–७८ हजार पुरस्कार पाए । टिम व्यवस्थापक निवासगोपाल वैद्यले १ लाख ९५ हजार पाए । करातेतर्फ २५ लाख ३५ हजार रुपैयाँ पुरस्कार वितरण गरिएको थियो ।

एसियाडमै ऐतिहासिक कांस्य विजेता नेपाली महिला कबड्डी टोलीले कुल ४८ लाख १० हजार पुरस्कार पायो । मेनुका राजवंशी (कप्तान), मानमती विष्ट, जयन्ती बडू, सुनीता थापा, रविना चौधरी, अनुजा कुलुङ राई, गंगा घिमिरे, नीतु गुरुङ, इशा राई, अर्पणा चौधरी, सिर्जनाकुमारी थारू र कलावती पन्तले जनही ३ लाख ९० हजार रुपैयाँ प्राप्त गरे । प्रमुख प्रशिक्षक पार्वती राईले २ लाख ६० हजार तथा सहायक प्रशिक्षक विष्णुदत्त भट्ट र व्यवस्थापक डिल्लीराम काफ्लेले समान १ लाख ३० हजार पुरस्कार हात पारे । एसियाली खेलकुदमा महिला कबड्डी टोलीले पहिलो सहभागितामै पदक जितेको हो ।

हाङचाउमै भएको चौथो पारा एसियाली खेलकुदको तेक्वान्दोमा ऐतिहासिक कांस्य जितेकी पलेशा गोवर्धनले १३ लाख रुपैयाँ पुरस्कार पाइन् । पारा एसियाली खेलकुदमा पलेशाले पाएको नेपालको एकमात्र पदक हो । अघिल्ला तीन संस्करणमा नेपाल सहभागी भए पनि पदक जित्न सकेको थिएन । प्रशिक्षक कविराज नेगी लामाले २ लाख ६० हजार र व्यवस्थापक रामचन्द्र श्रेष्ठले १ लाख ३० हजार रुपैयाँ पुरस्कार पाए ।

खेलकुदमन्त्री विराजभक्त श्रेष्ठ, राष्ट्रिय खेलकुद परिषद् (राखेप) का सदस्य–सचिव टंकलाल घिसिङ र खेलकुद मन्त्रालयका सचिव सुमनराज अर्यालले पदक जितेका खेलाडीलाई नगदसहित प्रशंसापत्र प्रदान गरेका हुन् । कुल २ करोड ९७ लाख १० हजार रुपैयाँ प्रदान गरिएको मन्त्रालयले जनाएको छ । राखेपको सिफारिसमा युवा तथा खेलकुद मन्त्रालयले खेलाडीसहित टोलीको पुरस्कारका लागि मन्त्रिपरिषद्मा प्रस्ताव गरेको र सोही प्रस्ताव गत वैशाख ७ मा बसेको मन्त्रिपरिषद् बैठकले पारित गरेको हो । अर्थ मन्त्रालयबाट शुक्रबार पुरस्कार रकम खेलकुद मन्त्रालयको खातामा जम्मा भएपछि खेलाडीलाई आइतबार प्रदान गरिएको हो ।