२१.१२°C काठमाडौं
दीपेन्द्रद्वारा एकै ओभरमा ६ छक्का प्रहार
काठमाडौँ — दीपेन्द्रसिंह ऐरीले एकै ओभरमा लगातार ६ छक्का प्रहार गरेर नयाँ कीर्तिमान बनाएका छन् । दीपेन्द्रले ओमानमा भइरहेको एसीसी ट्वान्टी–२० प्रिमियर कप क्रिकेटमा कतारविरुद्ध समूहचरणको खेलको अन्तिम ओभरमा लगातार ६ छक्का प्रहार गरेका हुन् ।
मस्कट स्थित अल अमेरातमा कतारका बलर कामरान खानको अन्तिम ओभरको सबै बलमा छक्का प्रहार गरेका थिए ।
अन्तर्राष्ट्रिय क्रिकेटमा लगातार ६ छक्का प्रहार गर्ने उनी पाँचौं खेलाडी हुन् । यसअघि दक्षिण अफ्रिकाका हर्स्चेल गिब्सले २००७ को एकदिवसीय विश्वकपमा नेदरल्यान्ड्सविरुद्ध वेस्ट इन्डिजको बेसटेरेमा र भारतका युवराज सिंहले २००७ को ट्वान्टी–२० विश्वकपमा इंग्ल्यान्डविरुद्ध एकै ओभरको सबै ६ बलमा छक्का प्रहार गरेका थिए ।
वेष्ट इन्डिजका किइरन पोलार्ड र अमेरिकाका जसकरण मलहोत्राले पनि एकै ओभरमा ६ छक्का प्रहार गरेका थिए ।
दीपेन्द्रले लगातार ६ छक्का प्रहार गरेको यो दोस्रो पटक हो । चीनको हाङचउमा गत वर्ष भएको १९ औं एसियाली खेलकुदमा दीपेन्द्रले मंगोलियाविरुद्ध ९ बलमै अर्धशतक बनाउनेक्रममा लगातार ६ छक्का प्रहार गरेका थिए । एकै ओभरमा दीपेन्द्रले ६ छक्का प्रहार गरेको भने यो पहिलो पटक हो ।
दीपेन्द्रले कतारविरुद्धको खेलमा १९ बलमा अर्धशतक पुरा गरेका थिए ।
दीपेन्द्रले अविजित ६४ रन बनाएपछि टस जितेर ब्याटिङ गरेको नेपालले निर्धारित २० ओभरमा ७ विकेट गुमाई २ सय १० रन बनाएको छ । नेपालले प्रतियोगिताको पहिलो खेलमा मलेसियालाई ५ विकेटले पराजित गरेको थियो ।
प्रकाशित : वैशाख १, २०८१ १८:२६
