मेयर कप ब्याडमिन्टनको उपाधि वसन्त र प्रेमको जोडीलाई
ताप्लेजुङ — चौथो मेयरकप ब्याडमिन्टन प्रतियोगिताको उपाधि वसन्त र प्रेमको जोडीले जितेका छन् । सिनियर डबल्सतर्फ आन्द्रेश आङ्बोहाङ र भुपे फेम्सोहाङको जोडीलाई २१-९, २१-११ को सोझो सेटमा पराजित गर्दै उनीहरुले उपाधि जितेका हुन् ।
उनीहरूले २५ हजार नगद हात पारे भने आन्द्रेश र भुपेशको जोडीले २० हजारमा चित्त बुझाउनु पर्यो ।
भेट्रान्सतर्फ वसन्तकुमार गुरुङ र मानबहादुर लिम्बूको जोडीले काजीमान गुरुङ र सरोज लिम्बूको जोडीलाई पराजित गर्दै उपाधि जिते । जुनियरतर्फ केशव पौडेल र शिव काम्बाङको जोडीले दक्ष लिम्बू र वसन्त तामाङको जोडीलाई २-१ को खेलमा पराजित गरे ।
मिक्स डबल्सतर्फ भावनादेवी केदेम र आन्द्रेश लिम्बूको टिमले सरुना गुरुङ र प्रेम माबोको टिमलाई सोझो सेटमा पराजित गरे ।
कर्मचारीतर्फ गजेन्द्र थलङ र विकाश तामाङको जोडीले २-१ को अन्तरमा विकाश थेबे र पविन्द्र लिम्बूको जोडीलाई पराजित गर्दै उपाधि जिते । फुङलिङ नगरपालिकाको सहयोगमा सञ्चालित प्रतियोगितामा सुमन घतानी उत्कृष्ट र सुरज मादेन अनुशासित खेलाडीको रुपमा पुरस्कृत भए ।
प्रकाशित : चैत्र २५, २०८० १६:४४