एलिनाको पुलिस क्लबलाई स्वर्ण
काठमाडौँ — नेपाल पुलिस क्लबले पाँचौं सम्झना कप अन्तर्राष्ट्रिय टेबलटेनिस प्रतियोगिताको महिला टिम इभेन्टमा स्वर्ण पदक जितेको छ । लैनचौरस्थित राष्ट्रिय टेबलटेनिस प्रशिक्षण केन्द्रमा मंगलबार फाइनलमा पुलिसले कान्तिपुर भ्याली पिङपोङ क्लबलाई ३–० सेटले हरायो ।
डबल्समा पुलिसकी मञ्जु सुवाल र एलिना महर्जनको जोडीले भ्यालीकी स्वेच्छा नेम्वाङ र रविना महर्जनको जोडीलाई ११–९, ११–६, ११–९ को सोझो सेटमा पराजित गर्यो । सिंगल्समा पुलिसकी नविता श्रेष्ठले दिया देउलालाई ११–४, ११–५, ११–८ ले र एलिनाले रविनालाई ११–४, ३–११, ५–११, ११–४, ११–७ को सेटमा हराए ।
ललितपुर जिल्ला टेबलटेनिस क्लबद्वारा आयोजित प्रतियोगिताको भेट्रान महिला ४० वर्षमाथि सिंगल्समा ज्ञानभैरव डिल्लीबजार टेबलटेनिस क्लबकी इन्दिरा पौडेल पराजुली विजेता भइन् । इन्दिराले फाइनलमा आफ्नै क्लबकी सम्झना पोखरेललाई ११–६, ११–५, ११–४ को सोझो सेटमा हराइन् । लगनखलकी हीरादेवी नकर्मी र ज्ञानभैरवकी सविता बस्नेत केसी तेस्रो भए ।
सम्झना ल्याबोरेटोरी क्लिनिकको मुख्य प्रायोजनमा भइरहेको प्रतियोगितामा ७ स्पर्धाका २ सय पुरुष र ५६ महिला खेलाडी प्रतिस्पर्धी छन् । पुरुषमा भारतबाट ९, बेलायतबाट २ तथा फ्रान्स र पोर्चुगलबाट १–१ खेलाडी सहभागी छन् । महिलामा विदेशी खेलाडी सहभागी छैनन् ।
सिंगल्स र टिममा शीर्ष तीन स्थान हात पार्नेले क्रमशः ५० हजार, २५ हजार र १० हजार रुपैयाँ पुरस्कार पाउनेछन् । भेट्रान पुरुष सिंगल्स ४० वर्षमाथि र ५५ वर्षमाथि तथा महिला सिंगल्स ४० वर्षमाथिमा पहिलो हुनेले २० हजार, दोस्रोले १० हजार र तेस्रोले ५ हजार पुरस्कार जित्नेछन् ।
प्रकाशित : माघ १७, २०७९ २२:००
