अदानचुलीमा विवाद छैन, अब द्रुतगतिमा काम अघि बढ्छ : अध्यक्ष सिंह
हुम्ला — अदानचुली गाउँपालिकाका अध्यक्ष मोहनबिक्रम सिंहले आन्तरिक विवाद समाधान भएकाले गाउँपालिकाका सबै काम द्रुतगतिमा अघि बढ्ने बताएका छन् । गाउँपालिकाका अध्यक्ष र उपाध्यक्षबीच विवाद नभएको अध्यक्ष सिंहले बताए ।
वडाध्यक्ष र अन्य जनप्रतिनिधिहरुले अध्यक्ष र उपाध्यक्षलाई सँगै राखी सहमति गराएपछि अदानचुली गाउँपालिकाको विवाद टुंगिएको गाउँपालिकाका प्रवक्ता एवं वडा नं. ५ का अध्यक्ष कमल छत्यालले बताए । विगत २/३ महिनादेखि प्रमुख प्रशासकीय अधिकृतसहित कर्मचारी खटनपटन र पालिकाबाट संचालित विभिन्न योजनाबारे विवादपछि सिंगो पालिका नै अनिर्णयको बन्दी बनेको थियो । अध्यक्ष र उपाध्यक्षबीच सहमतिसँगै पालिकाका सबै काम रफ्तारमा अघि बढ्ने प्रवक्ता छत्यालले बताए ।
आपसी सहमतिसँगै पालिका अध्यक्ष सिंहको नेतृत्वमा उपाध्यक्ष, सबै वडाका अध्यक्ष, अन्य जनप्रतिनिधिहरुसहित पालिकाभित्र संचालन गरिएका विभिन्न योजनाहरुको शनिबार संयुक्तरुपमा अनुगमन गरिएको गाउँपालिकाका निमित्त प्रमुख प्रशासकीय अधिकृत मेघनाथ शाहीले बताए ।
गल्फागाडदेखि कालागाडसम्म १६ किलोमिटर सडक विश्व बैंकको सहयोगमा कालोपत्र हुने भएकाले त्यसको विस्तृत परियोजना प्रतिवेदन (डीपीआर)का लागि सडक आसपास रहेका भौतिक संरचना, सडक छेउछाउको घर जग्गाको प्रारम्भिक तथ्यांक संकलन थालेको हो ।
कर्णाली प्रदेशअन्तर्गत प्रादेशिक स्थानीय सडक सुधार आयोजना सुर्खेत, विश्व बैंकको आर्थिक सहयोग निर्माण गर्न लागिएको गल्फागाडदेखि कालागाडसम्मको १६ किलोमिटर सडक ८ मिटर चौडाई हुने अदानचुली गाउँपालिकाले जनाएको छ ।
प्रकाशित : चैत्र १९, २०७९ १३:३०