हातहतियार ३५ दिनभित्र नवीकरण गर्न लमजुङ प्रशासनको आग्रह
लमजुङ — जिल्ला प्रशासन कार्यालय लमजुङले हातहतियार लिएर नवीकरण नगरेकालाई ३५ दिन भित्र नवीकरण गर्न अनुरोध गरेको छ ।
विभिन्न व्यक्ति तथा संस्थाहरुले हातहतियार राख्नको लागि अनुमति लिने तर, नवीकरण गरेको अभिलेख नभेटिएकाले तोकिएको समयभित्र नवीकरण गर्न प्रशासनले सार्वजनिक सूचना प्रकाशित गरेको छ ।
प्रमुख जिल्ला अधिकारी बुद्धबहादुर गुरुङले नवीकरण नगरिएका हातहतियार स्वतः अबैध हुने भएकाले अबैध हातहतियार राख्नेलाई मुद्दा लाग्ने बताए । उनले कार्यालयमा आएर आफूसंग भएका हातहतियार नवीकरण गर्न सकिने बताए ।
प्रशासनका अनुसार इजाजतपत्र लिएका तर ५ वर्षभन्दा बढी समयदेखि नवीकरण म्याद गुजार्नेको हकमा भने नवीकरण नहुने भएको छ । ती हातहतियारहरु स्वतः अबैध भइसकेकाले त्यस्ता हातहतियार प्रशासन कार्यालयमा बुझाउन अनुरोध गरिएको छ । ५ वर्षसम्म नवीकरण नगरेका हातहतियार बुझाउन पनि प्रशासनले ३५ दिनभित्र बुझाउन आग्रह गरेको छ ।
प्रमुख जिल्ला अधिकारी गुरुङले आइतबारदेखि लागू हुने गरी ३५ दिने सूचना जारी गरिएको र तोकिएको समयभित्र नवीकरण नभएमा वा बुझाउनुपर्ने हातहतियार नबुझाएमा कानुनबमोजिम कारबाही गरिने बताए ।
जिल्ला प्रशासन कार्यालय लमजुङका अनुसार १ हजार बढी नागरिकले विभिन्न समयमा हातहतियार राख्ने अनमुति लिएका छन् । यीमध्ये २ सय ४५ वटामात्रै नवीकरण छन् । ७ सय ४६ वटा हातहतियार नवीकरण नभएको अवस्थामा रहेको प्रशासनले जनाएको छ ।
प्रकाशित : वैशाख ३, २०८१ १९:५१