ट्याङ्कर नियन्त्रणमा लिएर १६ हजार लिटर डिजेल चोरी

२० हजार लिटर डिजेल लिएर नेपाल आयम निगमको अमलेखगन्ज डिपोबाट निगमकै विराटनगरस्थित डिपोमा गइरहेको को १ ख ३६५५ नम्बरको टयाङ्कर गत शनिबार राति पूर्वपश्चिम राजमार्ग अन्तर्गत सप्तरीको कन्चनरुप नगरपालिका ९ स्थित पेट्रोल पम्पबाट चोरी भएको थियो ।

माघ ११ गते अमलेखगन्जबाट विराटनगरका लागि उक्त टयाङ्कर चालक विनोद भुजेलले लिएर हिँडेका थिए । आइतबाट बिहान पूर्वपश्चिम राजमार्ग भन्दा उत्तरतर्फ शम्भुनाथ नगरपालिका २ खैरबनामा जंगल जाने बाटोमा स्थानीय बासिन्दाहरुले बेवारिसे अवस्थामा टयाङ्कर देखेपछि प्रहरीलाई खबर गरेका थिए ।

प्रहरीले अनुसन्धान सुरु गर्दै शंकास्पदहरुलाई सोधपुछ गरेपछि २० हजार लिटर डिजेल रहेको उक्त टयाङकरबाट १६ हजार लिटर डिजेल सप्तरीकै दुई पेट्रोल पम्पमा खन्याइएको खुलेको छ । कन्चनरुप नगरपालिका ९ स्थित पेट्रोल पम्पमा पार्किङ गरी चालक विनोद भुजेल रुपनगरस्थित आफ्नो घरमा सुत्न गएको बेला ट्याङ्कर चोरी भएको थियो ।

प्रहरीको अनुसन्धानका क्रममा सो ट्याङ्कर पूर्वचालक नवराज भुजेल र अर्का चालक अनिल चौधरीको योजनामा चोरी गरी राजमार्गको बाटो हुँदै जण्डौलस्थित दिलिप ट्रेर्डस पेट्रोल पम्प र शम्भुनाथस्थित भण्डार आयल स्टोरमा लगेर डिजेल खन्याइएको थियो । पूर्वचालक भुजेल र अर्का चालक चौधरीको मिलेमतोमा ट्याङ्कर चोरिएको र चोरीपछि चोरीको डिजेल खरिद गर्ने कार्यमा दुईवटा पेट्रोल पम्पका संचालकको संलग्नता पाइएको छ ।

उक्त घटनाबारे अनुसन्धान गरिरहेका इलाका प्रहरी कार्यालय कन्चनपुरका डीएसपी रामकुमार यादवले जम्मा २० हजार लिटर डिजेल रहेको टयाङकरबाट दुईवटा पेट्रोल पम्पमा गरी १६ हजार लिटर डिजेल निकालिएको र ४ हजार लिटर डिजेल ट्याङ्करमै छोडी पूर्वपश्चिम राजमार्ग भन्दा उत्तर शम्भुनाथ नगरपालिका २ खैरबनामा जंगल जाने बाटोमा छोडेर गएका थिए ।

चोरीको घटनापछि प्रहरीले डिजेल खन्याउने भण्डार आयल स्टोरका श्यामकुमार साहलाई नियन्त्रणमा लिएको छ । घटनामा संलग्न अन्य व्यक्तिको खोजी भइरहेको प्रहरीले जनाएको छ । घटनाबारे थप अनुसन्धान भइरहेको डीएसपी यादवले बताए ।