१८.१२°C काठमाडौं
दुधकोसी सामुदायिक वनमा अवैधरुपमा रुख कटान
उदयपुर — जिल्लाको बेलका नगरपालिका–८ स्थित दुधकोसी सामुदायिक वनमा अवैधरुपमा हरियो रुख काटिएको छ । वन समूहकै पदाधिकारीको मिलेमतोमा ३५ वटा साखु र एक चिलाउनेको रुख काटिएको हो ।
डिभिजन वन कार्यालयसँग अनुमति नलिई ३६ वटा हरियो रुख काटिएको डिभिजन वन कार्यालयका सूचना अधिकारी सहायक वन अधिकृत जागेश्वर साहले बताए । उनका अनुसार चोरी तस्करी गर्ने समूहसँगको संलग्नताका रुख काटिएको हुन सक्छ ।
काटिएको रुखमध्ये ७९ थान साखु र १ थान चिलाउनेको गोलिया वन क्षेत्रबाट बरामद गरिएको सूचना अधिकारी सहायक वन अधिकृत साहले बताए । बरामद गरिएको काठ डिभिजन वन कार्यालय गाईघाटमा ल्याइ घाटगद्दी गरिएको छ ।
बरामद गरिएको काठ नापजाँच हुन बाँकी नै छ । त्यसपछिमात्रै कति परिमाणमा रुख काटिएको यकिन तथ्यांक आउने सूचना अधिकारी सहायक वन अधिकृत साहले बताए ।
अवैधरुपमा रुख काटिएको डिभिजन वन कार्यालयमा सूचना पुगेपछि समूहका अध्यक्ष मनिराज राई, अन्य पदाधिकारी सम्पूर्ण कार्यसमिति फरार भएका छन् । सूचना अधिकारी साहका अनुसार अध्यक्ष राईसहित सम्पूर्ण कार्यसमितिको नाममा पक्राउ पूर्जी जारी गरिएको छ ।
प्रकाशित : जेष्ठ ३१, २०८० १६:४८
