प्रकाशकीय : लोकतान्त्रिक व्यवस्थाका आधारभूत सिद्धान्तमाथि सम्झौता गर्न कान्तिपुर तयार छैन
२०४६ को राजनीतिक परिवर्तन र त्यसपछि सुरु भएको खुला बजारले नेपाली समाज र अर्थतन्त्रलाई गतिशील बनाएकै हो । अझ लोकतन्त्रको सबलीकरण र नेपाली मिडियाको औद्योगीकरण यात्रा सँगसँगै अघि बढेका हुन् ।
आजभन्दा ३१ वर्षअघि स्थापना भएको कान्तिपुर पब्लिकेशन्स्ले नेपालमा व्यावसायिक पत्रकारितालाई संस्थागत गरेको मात्र होइन, अभिव्यक्ति तथा राजनीतिक स्वतन्त्रतालाई पनि सशक्त आवाज प्रदान गर्दै आएको छ । यो बीचमा देशका लागि समय सधैं सहज अवश्य थिएनन् ।
छोटा–छोटा अन्तरालमा भएका ठूला–ठूला परिवर्तनले देशको आत्मविश्वासलाई हल्लाउन नखोजेका पनि होइनन् । तर यी सबै कम्पन र परिवर्तनमा कान्तिपुर एक अमुक साक्षीका रूपमा होइन, हस्तक्षेपकारी हिस्सेदारका रूपमा रहँदै आएको छ । विधि र सुशासनको पक्षमा कान्तिपुरले देशको आवाज र देशले कान्तिपुरको संवादलाई साथ दिँदै आएकाले आज सफलतापूर्वक पब्लिकेशन्स्ले ३१ औं वार्षिकोत्सव मनाउँदै छ । यो गौरवपूर्ण दिनमा कान्तिपुरका समस्त पाठक, शुभचिन्तक, बिक्रेता, विज्ञापनदाता तथा विभिन्न कालखण्डमा कान्तिपुर परिवारमा जोडिएर आफ्नो भूमिका पूरा गर्ने समस्त सहकर्मीप्रति पब्लिकेशन्स् नतमस्तक छ ।
संसारभर मूलधारको मिडियाका समाचारलाई अवमूल्यन गर्न मिथ्या र भ्रामक सूचनाको आँधी चलिरहेको छ । हुरी, बतास वा आँधीको आयु जति छोटो भए पनि त्यसको प्रवृत्ति ध्वंसात्मक हुनेमा सन्देह छैन । त्यसैले त्यो प्रतिकूलताको सामना गर्न संस्थागत प्रेस र नागरिक समाजको सहकार्य अझ बलियो हुनुपर्ने भएको छ । किनकि संस्थागत सञ्चारगृहले प्रशोधन गरेर प्रकाशन गरेका समाचारप्रति अनास्था फैलाउने प्रवृत्ति कुनै संस्था विशेष र पेसा विशेषलाई होइन, समग्र लोकतन्त्रकै लागि खतरनाक हुन्छ ।
कसैलाई प्रिय लाग्न सक्छ वा अप्रिय पनि । यसको लेखाजोखा गरेर लोकतान्त्रिक व्यवस्थाका आधारभूत सिद्धान्तमाथि सम्झौता गर्न कान्तिपुर तयार छैन । जननिर्वाचित संविधानसभाबाट लिपिबद्ध संविधानले प्रत्याभूत गरेको पूर्ण प्रेस स्वतन्त्रतासहितको लोकतन्त्र, संघीयता र धर्मनिरपेक्षता कान्तिपुरका पनि मार्गदर्शक सिद्धान्त हुन् । संविधानले निर्दिष्ट गरेको मार्गबाट कोही कतै विचलित हुन खोजेमा खबरदारी गर्ने आफ्नो जिम्मेवारीबाट कान्तिपुर कहिल्यै डगमगाएको छैन, डगमगाउने छैन ।
हो, देश अहिले अघोषित आर्थिक मन्दीबाट गुज्रिरहेको छ । त्यसका प्रभाव पर्यटन, शिक्षा, स्वास्थ्य र अन्य उद्यम तथा व्यवसायमा जस्तै मिडियामा पनि परेको छ । समय साँच्चै कठिन छ तर हरेक कठिनाइको पनि आफ्नो अवधि र चक्र हुन्छ ।
अझ, समग्र नेपाली अर्थतन्त्रको परिवेशलाई बिर्सेर आफ्नै अनुकूलता वा प्रतिकूलताबाट प्रभावित हुने सुविधा मिडियालाई छैन । समाज संकटमा परेका बेला मार्गदर्शन गर्ने झन् ठूलो जिम्मेवारी मिडियाको छ । त्यो जिम्मेवारी पूरा गर्न कान्तिपुर पब्लिकेशन्स् सबल र प्रतिबद्ध छ । हामीलाई थाहा छ, आरोह–अवरोह आउँछन् जान्छन्, व्यावसायिक सम्बन्ध र जिम्मेवारी भने अटुट छ ।
प्रकाशित : फाल्गुन ७, २०८० ०६:४९