राष्ट्रिय एकतालाई सुदृढ बनाउन प्रधानमन्त्री दाहाल उपयुक्त पात्र हुनुहुन्छ : जसपा नेता राई

मंगलबार प्रधानमन्त्री दाहालले प्रतिनिधिसभामा प्रस्तुत गरेको विश्वासको प्रस्तावमाथिको छलफलमा भाग लिँदै सांसद राईले संघीयता कार्यान्वयनलगायतका काम गर्न सरकारलाई आग्रह गरे ।

अझै पनि संघीयता पूर्ण रूपमा कार्यान्वयन नभएको उल्लेख गर्दै राईले भने, 'संघीयतामा गइसके पनि प्रदेशहरूले काम गर्न सक्ने वातावारण बनिसकेको छैन । २०७४ सालपछि मुख्यमन्त्री बन्नु भएका व्यक्तिहरूले गर्नु भएको क्रन्दन आज पनि याद आइरहेको छ ।'

त्यस्तै राईले कर्मचारीतन्त्रलाई परिणाममुखी बनाउनु पनि आजको आवश्यकता भएको बताए । 'कर्मचारीतन्त्रलाई प्रक्रियामुखी होइन कार्यमुखी बनाउनु छ ।अहिले राष्ट्रिय एकतालाई सुदृढ बनाउँदै अगाडि बढ्नु छ, यो आवश्यकतालाई परिपूर्ति गर्नका लागि सक्षम हुनुहुन्छ अनुभवी हुनुहुन्छ उपयुक्त पात्र हुनुहुन्छ भन्ने विश्वासका साथ हाम्रो पार्टीले विश्वासको मत दिने निर्णय गरेको छ,' उनले भने ।