भेरी बबईमा साढे ९ वर्षमा ६५ प्रतिशत काम

पहिलो चरणमा टनेल बोरिङ मेसिनबाट १२.२० किलोमिटर टनेल निर्माणको काम सकिसकेको आयोजनामा दोस्रो चरणअन्तर्गत बाँध तथा पावरहाउस निर्माण, हाइड्रो मेकानिकल, इलेक्ट्रो मेकानिकल जडान एवं निर्माणलगायत काम भइरहेका छन् । अहिले सुर्खेतको चिप्लेमा हेडवर्क्स निर्माणको काम जारी रहेको आयोजनाका सूचना अधिकारी सिनियर डिभिजनल इन्जिनियर पवन अधिकारीले बताए । ६ वटा वेमध्ये दुई वटा निर्माणको काम अन्तिम चरणमा छन् । ‘अरू ४ वटा वे निर्माणका लागि नदी फर्काउने तयारी भइरहेको छ,’ अधिकारीले भने, ‘पावरहाउस निर्माणस्थल हात्तीखोलामा स्लोप प्रोटेक्सनको काम अन्तिम चरणमा पुगेको छ, त्यस्तै फाउन्डेसन, कोफर्ड ड्याम, एंकर ब्लक निर्माणलगायत काम पनि धमाधम गरिरहेका छौं ।’

सुर्खेतको भेरीगंगा नगरपालिकास्थित चिप्लेस्थित भेरी नदीमा बाँध बाँधेर सुरुङमार्फत भेरीको पानी सुर्खेत र बर्दियाको सिमानामा रहेको बबई नदीमा खसाल्ने र झन्डै ४६ मेगावाट विद्युत् उत्पादन गर्ने योजनासहित आयोजनाको काम भइरहेको हो । बाँके र बर्दियाको करिब ५१ हजार जमिनमा सिँचाइ सुविधा पुर्‍याउने आयोजनाको लक्ष्य छ । कोरोनाका कारण झन्डै २ वर्ष आयोजनाको काम प्रभावित हुन पुग्यो । ३३ अर्ब १९ करोड ६६ लाख लागत अनुमान गरिएको आयोजनामा झन्डै ५७ वित्तीय प्रगति हासिल भएको छ । यसमध्ये अहिलेसम्म १५ अर्ब ५० करोड रुपैयाँ खर्च भएको छ ।

यस वर्ष १ अर्ब ५९ करोड रुपैयाँ विनियोजन भएकामा माघ मसान्तसम्म ४९ करोड ७१ लाख रुपैयाँ खर्च भएको सिनियर डिभिजनल इन्जिनियर अधिकारीले जानकारी दिए । अबको तीन वर्षभित्र सक्ने गरी भइरहेको छ । गत वर्षको बाढीले नदीमा बाँध निर्माणमा समस्या भएकाले पनि आयोजनाको काममा ढिलाइ भएको उनले बताए । ‘अब कुनै अवरोध नआए अबको तीन वर्षभित्र सबै काम सक्ने तयारी रहेको छ,’ उनले भने, ‘तोकिएकै समयमा काम सक्ने गरी धमाधम काम पनि भइरहेको छ ।’ अहिले आयोजनामा झन्डै एक सय कामदारले काम गरिरहेका छन् । दोस्रो चरणका कामको जिम्मा रमण/ग्वाङडोन जेभीले लिएको छ ।

आयोजनाले उत्पादन गरेको विद्युत् उत्पादन गरेर राष्ट्रिय प्रसारणमा जोड्ने सरकारको योजना छ । तेस्रो चरणमा भेरीको पानीलाई सिँचाइमा प्रयोग गर्ने योजनासहित काम अगाडि बढाइने आयोजनाले जनाएको छ । सुर्खेतको चिप्लेमा बाँध बनाएर सुरुङमार्फत प्रतिसेकेन्ड ४० घनमिटर भेरीको पानी बबईमा खसाल्ने आयोजनाको लक्ष्य रहेको सिनियर डिभिजनल इन्जिनियर अधिकारीले बताए । भेरीको पानी बबई नदीमा खसाल्न चिप्लेमा बाँध निर्माणको काम भइरहेको हो, जहाँ १ सय १४ मिटर लामो र १४ मिटर अग्लो ब्यारेज बनाइनेछ ।

कर्णालीको सबैभन्दा ठूलो र संघीय सरकारको राष्ट्रिय गौरवको आयोजना भएकाले तोकिएको समयमा जसरी पनि सम्पन्न हुनुपर्ने नागरिक अगुवा दुर्गाप्रसाद सापकोटाले बताए । ‘पहिलो चरणको काम त नमुनाकै रूपमा नेपालमै पहिलोपल्ट टनेल बोरिङ मेसिनमार्फत गरियो,’ उनले भने, ‘त्यसैले पर्याप्त बजेट विनियोजन गरी सरकारले आयोजनाको काममा कुनै अवरोध हुन दिनुहुँदैन ।’ आयोजना पूरा भए कर्णालीको विकासमा पनि ठूलो सहयोग पुग्ने उनको भनाइ छ । आयोजनाको काम तोकिएकै समयमा सक्ने गरी प्रदेश सरकारका तर्फबाट आवश्यक समन्वय भइरहेको कर्णाली प्रदेश सरकारकी जलस्रोत तथा ऊर्जा विकासमन्त्री उर्मिला विश्वकर्माले जनाइन् ।

आयोजनामा तेस्रो चरणमा हाइड्रो र इलेक्ट्रोको काम सँगसँगै अन्य विद्युतीय कामins पनि हुनेछन् । आयोजना सञ्चालनका क्रममा सुर्खेतको भेरीगंगा, गुर्भाकोट र लेकबेंसीको ३२ हेक्टरभन्दा बढी जग्गा डुबानमा पर्ने आयोजनाको अनुमान छ । यसका लागि झन्डै ८ हेक्टर जग्गाको मुआब्जा वितरण गरिसकेको छ भने झन्डै साढे १० हेक्टर जग्गा प्राप्तिका लागि सूचना प्रकाशन गरी प्रमाणीकरणको काम गरिरहेको आयोजनाले जनाएको छ । स्वदेशी लगानीमा निर्माण भइरहेको यो आयोजनाको ०७१ चैत १९ मा तत्कालीन प्रधानमन्त्री सुशील कोइरालाले शिलान्यास गरेका थिए । ३६ अर्ब ८० करोड रुपैयाँको लागतमा आयोजना निर्माण सम्पन्न हुने अनुमान छ ।