देश युवा बेच्‍ने कारखाना बनेको छ : अध्यक्ष लिङ्देन

‘छोरा बेचेर देश चलाउनुपर्ने अवस्था छ,’ उनले भने, ‘मेरो देश युवा बेच्ने कारखाना बनेको छ । नेपाल बेरोजगार उत्पादन गर्ने देश पनि हो ।’

सरकारले अर्थतन्त्र सुधार गर्नतर्फ ध्यान नदिएको आरोप लगाउँदै उनले सरकार नियन्त्रित संस्थामा ब्याजदर घटाएर सुरुआत गर्नुपर्ने बताए । ‘कित्ताकाट रोकिएको छ,’ उनले भने, ‘सरकारले कित्ताकाटमात्रै फुकाउने हो भने केही मात्रामा राजस्व वृद्धि हुने थियो ।’ उनले जग्गाको वर्गीकरण नै वैज्ञानिक नभएको पनि बताए ।

अध्यक्ष लिङ्देनले अहिलेको व्यवस्था नै गलत रहेको टिप्पणी गरे । व्यवस्था ल्याउने पात्र पनि गलत रहेको भन्दै उनले व्यवस्था परिवर्तनका लागि राप्रपा लडिरहेको बताउँदै भने, ‘देशमा अर्थतन्त्र खस्किँदै गएको छ । यो व्यवस्था महँगो भयो । अब जनता व्यवस्था परिवर्तनका लागि सडकमा आउँछन् । यसको नेतृत्व राप्रपाले लिनेछ ।’ उनले ऋण लिएर सरकारी कर्मचारीलाई तलब खुवाउनुपर्ने अवस्था रहेको बताए ।