स्याटकम सेवामा स्मार्टफोनहरूको बढ्दो प्रतिस्पर्धा
![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
काठमाडौँ — हाल स्पेनको बार्सिलोनामा जारी मोबाइल वर्ल्ड कंग्रेसमा साओमी, ओप्पो, भिभो, मोटोरोला, नथिङ र अनर फोनका निर्माताले आफ्ना डिभाइसमा स्याटलाइट सञ्चारसम्बन्धी सुविधा थप्न लागेको बारे घोषणा गरेका छन् ।
![](https://assets-cdn.ekantipur.com/uploads/source/ads/reward-900x100-pxl-2462024072414.gif)
![स्याटकम सेवामा स्मार्टफोनहरूको बढ्दो प्रतिस्पर्धा](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2023/third-party/smartphone-0332023035159-1000x0.jpg&w=1001&h=0)
![](https://assets-cdn.ekantipur.com/uploads/source/ads/sathi-deposit-900-100-1262024124333.gif)
उक्त अवसरमा स्मार्टफोनहरूमा प्रयोग हुने सेमिकन्डक्टर चिप उत्पादन गर्ने अमेरिकी कम्पनी क्वाल्कमले स्याटलाइट कम्युनिकेसन (स्याटकम) का लागि एन्ड्रोइड फोनहरूले स्याटलाइट नेटवर्क सेवा प्रदायकसँग छलफल थालिएको जानकारी गराइएको थियो ।
गत महिना मात्रै क्वाल्कमले स्याटलाइट सेवा प्रदायक इरिडियम कम्युनिकेसन्ससँग साझेदारी गरी यस वर्षको अन्त्यसम्ममा महँगा एन्ड्रोइड फोनहरूमा स्याटलाइट कनेक्टिभिटी जोड्ने घोषणा गरिसकेको छ । आफ्नो स्न्यापड्रागन स्याटलाइट प्रविधि उद्घाटन गर्दै यसले कुनै पनि नेटवर्क उपलब्ध नभएको आपत्कालीन अवस्था वा अनकन्टार ठाउँमा एन्ड्रोइड फोनका प्रयोगकर्तालाई सन्देश पठाउने सुविधा दिने क्वाल्कमले जनाएको थियो । कम्पनीका अनुसार आगामी मोडलका एन्ड्रोइड मोबाइल फोनहरूमा स्न्यापड्रागन स्याटलाइट सेवा समावेश हुनेछन् ।
गत सेप्टेम्बरमा आइफोन १४ सार्वजनिक गर्ने क्रममा एप्पल कम्पनीका प्रमुख टिम कुकले यसमा स्याटलाइट कनेक्टिभिटी रहेको विषयलाई निकै प्राथमिकतासाथ उल्लेख गरेका थिए । आइफोन १४ मा इमर्जेन्सी एसओएस भाया स्याटलाइट सुविधा समावेश हुनेछ । यसले सेलुलर र वाइफाई दुवै नेटवर्क नचलेका बेला सञ्चारको सुविधा दिनेछ । प्रयोगकर्ताले आफ्नो मोबाइल फोनलाई आकाशतर्फ फर्काएर भूउपग्रहमार्फत उद्धारकर्ता वा आफन्तलाई छोटो म्यासेज पठाउन सक्नेछन् । इमर्जेन्सी एसओएस भाया स्याटलाइट फिचर एक्टिभेट गरेपछि उद्धारकर्ताकहाँ नोटिफिकेसनसमेत जाने सुविधा रहनेछ । आइफोनको इमर्जेन्सी एसओएस सुविधाले थुप्रैको ज्यान बचाउन सकेको बारे बेलाबखत समाचार आउने गरेका छन् । गएको जनवरीमा क्यानडाको अल्बेर्टाको यात्राबाट फर्किरहेका दुई महिला राजमार्ग बन्दका कारण वैकल्पिक बाटो रोजी होम्स फरेस्ट सर्भिस रोड हुँदै फर्किरहेका थिए । करिब २० किमि पर पुग्दा बाटो सकिएपछि उनीहरू अलमल्ल परी फर्किन खोज्दा हिउँमा हराएका थिए । दुवैको मोबाइलमा कुनै नेटवर्क उपलब्ध थिएन । दुईमध्ये एक महिलाले आफ्नो आइफोन १४ मा रहेको इमर्जेन्सी एसओएस भाया स्याटलाइट सेवा एक्टिभेट गरेपछि सर्च एन्ड रेस्क्यु टिमले उनीहरूको खोजी थालेको थियो । जीपीएस ठेगानामार्फत उनीहरूसम्म पुगेर दुवै महिलाको सफल उद्धार गरिएको थियो ।
स्याटलाइट टेलिकक्युनिकेसनको सेवा दिँदै आएको ग्लोबलस्टार नेटवर्कसँगको सहकार्यमा एप्पलले उक्त भूउपग्रहको नेटवर्कमार्फत आफ्ना प्रयोगकर्तालाई सन्देश पठाउने सुविधा दिएको हो । एप्पलले सुरुमा संयुक्त राज्य अमेरिका र क्यानडामा मात्रै यो सुविधा ल्याए पनि हाल फ्रान्स, जर्मनी, आयरल्यान्ड र बेलायतमा इमर्जेन्सी एसओएस भाया स्याटलाइट फिचर उपलब्ध गराइसकेको छ । यसअघि स्पेस एक्स र टी मोबाइलले पनि मोबाइल फोनमा स्याटलाइट कनेक्टिभिटीको सुविधा दिनेबारे जानकारी दिएका थिए ।
पछिल्लो समय सबैजसो स्मार्टफोन निर्माताले आफ्ना डिभाइसमा स्याटकम सेवा समावेश गर्नेबारे एकपछि अर्को घोषणा गरिरहेका छन् । मोबाइल प्रविधिको पछिल्लो र नयाँ आविष्कार मानिएको स्याटकम सेवाबारे ६ महिनायता मात्रै विभिन्न स्मार्टफोन निर्माता, चिपसेट प्रदायक र वायरलेस क्यारियरहरूले फोनलाई स्याटलाइटसँग जोड्नेबारे नयाँ–नयाँ घोषणा गरिरहेका छन् । कसैले जियोस्टेसनरी अर्बिट (जीईओ) स्याटलाइट प्रयोग गरी स्याटकम सेवा दिने बताइरहेका छन् त कसैले लोअर्थ अर्बिट (एलईओ) स्याटलाइटमार्फत मोबाइल फोनलाई भूउपग्रहसँग जोड्ने भनिरहेका छन् ।
(एजेन्सीको सहयोगमा)
प्रकाशित : फाल्गुन १९, २०७९ ०८:३७