नेपालमा भित्रियो पार्टी बस

भारतको टाटा मोटर्सले उत्पादन गरेको बसको च्यासिसलाई पार्टी गर्न मिल्ने थलोका रूपमा परिमार्जन गरिएको छ । यहाँभित्र सिट छैनन् । सोफा शैलीमा दुईतिर काउच राखिएको छ, जहाँ एक पटकमा ३६ जनाले यात्रा गर्न सक्छन् । बसभित्रै मदिराको सुविधा र खाना तताउने उपकरणसहितको बार छ । त्यससँगै अगाडि एक जना डिजे हुन्छन् । संगीतको आनन्दमा मदिरा तथा कफी पिउँदै यात्रा गर्न सकिन्छ ।

रियल इकोनोमिक सस्टिनेबल सोसाइटी नेपाल (रेस नेपाल) ले यो बस एक साताभित्रै व्यावसायिक रूपमा सञ्चालनमा ल्याउँदै छ । पार्टी राइड, एयरपोर्ट पिकअप, घुमफिर, पिकनिक, विवाह, निजी कार्यक्रम आदिमा यो बस प्रयोग गर्न सकिनेछ । बस प्रयोग गर्न चाहनेले प्रति तीन घण्टाको ३५ हजार रुपैयाँ शुल्क तिर्नुपर्ने रेस नेपालले जानकारी दिएको छ । ‘मुख्य गरी बिहे र पर्यटकका लागि यो बस उपयुक्त छ,’ कम्पनीका निर्देशक अशोक शर्माले भने ।

भ्रमण वर्षको अवसर पारेर बस सञ्चालनमा ल्याइएको उनले बताए । ‘हाम्रो उद्देश्य आम मानिसलाई विभिन्न खाले मनोरञ्जन प्रदान गर्दै देशका विभिन्न ठाउँको यात्रा गराउने हो,’ उनले भने । प्रतिबस २ करोड हाराहारी लागत परेको उनले जानकारी दिए ।