बाबु-छोराछोरीको सँगै एसईई
हुम्ला — हुम्ला सदरमुकाम सिमकोटदेखि ३४ कोष टाढा पर्ने कोट माध्यमिक विद्यालय परीक्षा केन्द्र रोडीकोटबाट एकै परिवारका बुबाछोराले सँगै माध्यमिक शिक्षा परीक्षा (एसईई) दिएका छन् ।
सर्केगाड गाउँपालिका वडा नं ५ का ६० वर्षीय मानबहादुर शाही र उनका १५ वर्षीय छोरा यज्ञबहादुरले सँगै एसईईको परीक्षा दिएका हुन् ।
यसैगरी हिमज्योति माध्यामिक विद्यालय सर्केगाड परीक्षा केन्द्रबाट सर्केगाड गाउँपालिका–१ का ५० वर्षीय नन्दलाल बुमी र उनकी १६ वर्षीया छोरी जयलक्ष्मीले पनि एसईईको परीक्षा दिएका छन् ।
शुक्रबार सुरु भएको एसईई परीक्षा अन्तर्गत हुम्लाका ६ वटा परीक्षा केन्द्रमा १ हजार २ सय ३४ जना परिक्षार्थीहरूमध्ये २८ जना अनुपस्थित रहेको परीक्षा केन्द्रका केन्द्राध्यक्षलाई उद्धित गर्दै शिक्षा विकास तथा समन्वय ईकाइ हुम्लाका प्रमुख तिलक भट्टराईले बताए ।
जसअन्तर्गत बालमन्दिर माध्यमिक विद्यालय परीक्षा केन्द्र सिमकोटमा २ सय ५६ जना परिक्षार्थीमध्ये १२ जना अनुपस्थित रहे ।
यस्तै मानसरोवर माध्यमिक विद्यालय परीक्षा केन्द्र सिमकोटमा १ सय ८० जना परिक्षार्थीमध्ये ५ जना, हिमज्योति माध्यमिक विद्यालय परीक्षा केन्द्र सर्केगाडमा २ सय ५३ जना परिक्षार्थीमध्ये ६ जना अनुपस्थित थिए ।
यस्तै, कोट माध्यमिक विद्यालय रोडीकोट परीक्षा केन्द्रमा १ सय ४८ जना परीक्षार्थीमध्ये ४ जना, सूर्योदय माध्यमिक विद्यालय परीक्षा केन्द्र श्रीनगरमा १ सय ५७ जना परीक्षार्थीहरूमध्ये १ जना र मदानदेव माध्ययमिक विद्यालय परीक्षा केन्द्रमा २ सय ४० परीक्षार्थीमध्ये २ जना गरी जिल्लाभर २८ जना परीक्षार्थीहरू अनुपस्थित रहेका थिए ।
हुम्लाका सबै परीक्षा केन्द्रमा शान्तिपूर्ण र मर्यादित रूपमा परिक्ष संचालन भएको शिक्षा विकास तथा समन्वय इकाइका सूचना अधिकारी भीमराज कार्कीले बताए ।
प्रकाशित : चैत्र १७, २०७९ २१:२१
