आफ्नै घरमा आगो लगाउने एक व्यक्ति पक्राउ
गुल्मी — गुल्मीमा आफ्नै घरमा आगो लगाएको आरोपमा एक व्यक्ति पक्राउ परेका छन् । जिल्लाको धुर्कोट गाउँपालिका वार्ड नं ६ रजस्थल निवासी ५९ वर्षीय रेखबहादुर परियारलाई आफ्नै घरमा आगो लगाएको आरोपमा प्रहरीले पक्राउ गरेको हो ।
परियारले आइतबार साँझ मदिरा सेवन गरेर आफ्नै घरमा आगो लगाउँदा घरभित्र रहेको अन्नपात, लत्ताकपडा पूर्ण रुपमा जलेको जिल्ला प्रहरी कार्यालय गुल्मीका प्रहरी नायब उपरीक्षक शंकर पोखरेल जानकारी दिए ।
पोखरेलका अनुसार परियारले आफ्नो घरमा मात्रै नभई छिमेकीको घरमा समेत आगो लगाइदिने धम्की दिने गरेका थिए । आगलागीबाट परियारको घर जलेको छ । उनकी श्रीमती सिता परियारलाई जिल्ला प्रशासन कार्यालय गुल्मीले राहत उपलब्ध गराएको छ भने पक्राउ परेका परियारलाई छानबिन गरी कारबाही गरिने प्रहरीले जनाएको छ ।
प्रकाशित : वैशाख १०, २०८१ १५:५८