खाना पकाउने ग्यास लिक भई आगलागी हुँदा ३ जना घाइते

दोलालघाटमा सुन्दर श्रेष्ठको घरमा डेरा लिई बस्ने ३६ वर्षीया निरमाया तामाङको भान्सामा खाना पकाउने क्रममा ग्यास लिक भई आगलागी हुँदा ३ जना घाइते भएको जिल्ला प्रहरी कार्यालय काभ्रेका सूचना अधिकारी प्रहरी नायब उपरीक्षक राजकुमार श्रेष्ठले जानकारी दिए । उनका अनुसार, आगलागीमा निरमाया, सोही घरमा बस्ने सादना तामाङकी ७ वर्षीया छोरी सबिना र सिन्धुपाल्चोकको साँगाचोकगढी नगरपालिकाकी ११ वर्षीया प्रविसा परियार घाइते भएका छन् ।

घाइते भएका ३ जनालाई धुलिखेल अस्पतालबाट कीर्तिपुरस्थित बर्न अस्पतालमा रिफर गरिएको छ ।

आगो पाँचखाल नगरपालिकाको दमकल, स्थानीय र प्रहरीको सहयोगमा निभाइएको थियो । प्रहरीका अनुसार आगलागीबाट डेढ लाख रुपैयाँको धनमाल क्षति भएको अनुमान छ ।