भ्रष्टाचारलाई निरुत्साहित गरेमात्र मुलुकमा सुशासन कायम हुन्छ : सांसद तामाङ

जिल्ला समन्वय समिति नुवाकोटले सोमबार र मंगलबार आयोजना गरेको समीक्षा गोष्ठीमा सम्बोधन गर्दै सांसद तामाङले भ्रष्टाचारमा संलग्न कर्मचारी, जनप्रतिनिधिलाई खबरदारी गर्न सकेमात्रै नयाँ संविधानले परिकल्पना गरेको सुशासन, सामाजिक न्याय, समृद्धि आउने बताए । ‘वास्तवमा नयाँ संविधानले परिकल्पना गरे जस्तो सुशासन, सामाजिक न्याय, समृद्धिको परिकल्पना त्यो समृद्ध समाजवादको पदार्पण गर्ने भनेर भनेको छ,’ नेता तामाङले भने ।

उनले एकथरी संघीयताविरोधीले गाउँगाउँमा भ्रष्टाचार मौलाएको भन्दै राजनीतिक नेतृत्वप्रति वितृष्णा पैदा गराएकोमा असन्तुष्टि जनाए । ‘सिंहदरबार घर–घरमा पुर्‍याइयो भनिराखेका छौं,’ सांसद तामाङले भने, ‘तर त्यसलाई अरुले नेगेटिभ सेन्सबाट सिंहदरबार होइन्, सिंहहरु गाउँगाउँमा पुर्‍याउने काम गरिराखेका छौ । जसले गर्दा भ्रष्टाचार मौलाइरहेको अवस्था व्यापकरुपमा सिर्जना भइराखेको छ भन्ने हिसाबले पनि अहिलेको संविधान, व्यवस्था र अहिलेको राजनीति नेतृत्वप्रति वितृष्णा पैदा गराउने र कुनै न कुनै हिसाबले आक्रमण गर्ने र कमजोर बनाउने खालको अवस्था सिर्जना भइरहेको छ ।’

उनले सोच्ने शैली र मानसिकताको विकास गर्दै नकारात्मकतालाई भत्काउनुपर्ने बताए । उनले प्रदेशले निर्माण गर्नुपर्ने कानुन निर्माण नगरी दिँदा स्थानीय पालिकाहरु र कार्यालयहरुले झेल्नु परेको स्थिति र अवस्था, समयानुकूल विकास भएका प्रविधिको देखा परिराखेका समस्याहरुमा आफू जानकार भएको बताए । जिल्लास्थित सबै पालिका, संघसंस्था र कार्यालयहरुले आव २०७९/०८० को स्वीकृत वार्षिक कार्यक्रमको वार्षिक कार्यप्रगति प्रस्तुत गरेका थिए ।

जिसस प्रमुख रजिन्द्रविक्रमसिंह ठकुरीले अनुगमनको पाटो जिससको भएकोले समन्वय गर्न आग्रह गरेका थिए ।