ओलीको प्रतिवेदनले प्रचण्डलाई धक्का

ओलीले प्रस्तुत गरेको प्रतिवेदनको सार भनेको अब एमाले पनि निर्वाचनमा एक्लै मैदानमा उत्रन सक्नुपर्छ र एक्लै उत्रन्छ भन्ने नै हो । यसबाट कांग्रेस र एमालेको साथबिना एक्लै निर्वाचनको मैदानमा उत्रन नसक्ने माओवादीलाई निकै ठूलो चोट पुगेको देखिन्छ । चुनावी गठबन्धन मात्रै होइन, वाम एकताका लागि एमाले र माओवादी केन्द्रका केही नेताले नै बारम्बार पहल गरिरहेको भन्ने हल्लाका बीच ओलीले आफ्नो राजनीतिक प्रतिवेदनमा वाम एकता र समाजवादी ध्रुवीकरणलाई पाखा लगाइदिएका छन् ।

यसको सिधै असर पनि माओवादी केन्द्र र त्यसका अध्यक्ष प्रचण्डलाई नै पर्नेछ । माओवादीका लागि गठबन्धन गर्न अन्य त्यस्ता कुनै दल देखिँदैनन्, जसले देशैभरिको चुनावी नतिजालाई सकारात्मक असर पार्न सकोस् । माओवादीले एमालेलाई समाजवादी मोर्चामा समेत सहभागी गराउन प्रयास गरेको थियो, त्यसमा पनि धक्का लागिसकेको छ ।
– सुजन देवकोटा, पालुङ्टार–४, गोरखा

एमाले अध्यक्ष केपी शर्मा ओलीले शनिबार राष्ट्रिय महाधिवेशन प्रतिनिधि परिषद्को बैठकमा प्रस्तुत गरेको राजनीतिक प्रतिवेदनले राजनीतिक वृत्तमा ठूलै तरंग पैदा गरेको छ । त्यो तरंग पार्टीभित्रै सीमित रहन्छ कि त्यसले सरकारको भविष्यमै उथलपुथल ल्याउँछ ? त्यो हेर्न भने केही दिन कुर्नै पर्छ । तथापि ओलीको प्रतिवेदन र उनलाई काउन्टर दिन एकीकृत समाजवादीका अध्यक्ष माधव नेपालले दिएको वक्तव्यबाजी हेर्दा अहिलेको गठबन्धनको सय दिन पनि नटिक्ने देखिन्छ ।

नेता नेपाल र ओलीको तुस बढ्दै गए धेरैजसो प्रदेश सरकार भत्किने र त्यसले केन्द्रको सरकारलाई पनि प्रत्यक्ष असर पुर्‍याउने निश्चित छ । समाजवादीले सत्ता गठबन्धन छाडे मधेश प्रदेशमा जसपाको सरकार ढल्छ । समाजवादीले सरकार छाडे आफूले पनि बाध्य भई वर्तमान सरकार छाड्ने जसपाले बताइसकेको छ । कांग्रेस सत्तामा जान एउटा खुट्टा उचालेर बसेको छ । उसले नेता नेपाललाई फकाइरहेको छ ।

ओलीले आफ्नो प्रतिवेदनमा जे पनि लेख्न स्वतन्त्र छन् तर त्यसले गठबन्धन सरकारको भविष्यमा असर पर्छ कि पर्दैन भनेर सोच्नु आवश्यक थियो । वाम एकता र समाजवादी ध्रुवीकरण खारेज गर्ने प्रस्ताव ल्याउँदा नेता नेपाल र प्रचण्ड झस्कन्छन् भन्ने हेक्का राख्नुपर्थ्यो । प्रतिवेदनमा कांग्रेसलाई जतिसुकै गाली गरे पनि आफ्नै सत्ता सहयात्री दलहरूलाई झस्काउने गरी प्रतिवेदन लेख्नु ओलीको भूल हो । उनले समाजवादी पार्टीलाई दक्षिणपन्थी भासमा भासिएको भनेका छन् ।

रास्वपालाई देश बनाउने कुनै विचार, योजना र दृष्टिकोण नरहेको आरोप लगाएका छन् । ओलीले झैं रास्वपा सभापति रवि लामिछानेले पनि पुराना दलहरूको भिजन नहुँदा ३० वर्षमा पनि नेपालको विकास हुन नसकेको आरोप लगाए भने ओलीलाई कस्तो लाग्ला ? ओलीको बेमौसमी प्रतिवेदनले सरकार ढले त्यसको दोष ओलीले मात्र लिने कि सिंगो एमाले पार्टीले ? पार्टीभित्र यसबारे छलफल हुनुपर्छ । तर पनि ओलीको विरोध गर्ने हिम्मत कसको ? गरे कि भीम रावल बन्छन् कि धनश्याम भुसाल बनाइन्छ ।
– गोपाल देवकोटा, गोकर्णेश्वर ८, काठमाडौं