प्रतिनिधिसभा बैठक : किसानलाई दूधको बक्यौता रकम भुक्तानी गर्न सांसदहरुको माग
काठमाडौँ — सांसदहरुले किसानलाई दूधको भुक्तानी तत्काल उपलब्ध गराउन सरकारसँग माग गरेका छन् । प्रतिनिधिसभाको बुधबारको बैठकमा बोल्दै सांसदहरुले किसानका समस्या सरकारले तत्काल वार्तामार्फत सम्बोधन गर्नुपर्ने माग गरे ।
प्रतिनिधिसभाको आजको बैठकमा आकस्मिक समयमा बोल्दै नेकपा एमालेका प्रमुख सचेतक महेश बर्तौलाले किसानले दूधको भुक्तानीको माग गर्दै आन्दोलन गरेको लामो समय भएकाले सरकारले तत्काल समस्या समाधान गर्नुपर्नेमा माग गरे ।
उनले संविधान बमोजिम शान्तिपूर्ण ढंगबाट आफ्ना मागहरू लिएर आन्दोलन गरिरहेका किसानहरूमाथि प्रहरीले हस्तक्षेप गर्नु उचित नभएको बताए ।
कांग्रेस सांसद नागिना यादवले किसानको जीविकोपार्जनको मुख्य आधार कृषि भएकाले किसानको जायज माग पूरा गर्न सरकारको ध्यानाकर्षण गराए । 'आन्दोलनरत किसानको माग तत्काल सम्बोधन गर्नुपर्छ', उनले भनिन् ।
राष्ट्रिय प्रजातन्त्र पार्टी (राप्रपा) का सांसद दीपकबहादुर सिंहले दुध किसानहरुको वक्यौता रकम तत्काल भुक्तानी गर्न सरकारसँग माग गरे ।
उनले भने, ‘सर्वप्रथम त म दुध किसानहरुलाई सरकारले दमन गरेर, पक्राउ गरेर राखेको छ । उनीहरुलाई तुरुन्त रिहा गरी उनीहरुको बाँकी रकम चाँडोभन्दा चाँडो उपलब्ध गराउन आग्रह गर्दछु ।'
प्रकाशित : असार ५, २०८१ १४:४१