संसद् भवनको सुरक्षामा खटिएका प्रहरी जवान गोली लागेको अवस्थामा मृत फेला

संघीय संसद् सचिवालयका प्रवक्ता एकराम गिरीका अनुसार दोलखा घर भएका प्रहरी जवान अजित गोलेले आफैंले गोली हानी आत्महत्या गरेका हुन् ।

केन्द्रीय प्रहरी प्रवक्ता प्रहरी नायब महानिरीक्षक(डीआईजी) दानबहादुर कार्कीका अनुसार संसद् भवनको दुई नम्बर गेटको नजिकै रहेको शौचालयमा प्रहरी जवान गोले मृत अवस्थामा भेटिएका हुन् ।

डीआईजी कार्कीले इकान्तिपुरसँग भने, 'संसद् भवनको दुई नम्बर गेटनजिकै शौचालयमा प्रहरी जवान अजित गोले मृत भेटिएका हुन् । गोली पड्केको आवाज सुनिएको त्यहाँ कार्यरत अन्य सुरक्षाकर्मीले बताएका छन् । घटनास्थलमै उनको मृत्यु भएको भेटिएको छ । अहिले हामी प्रारम्भिक अनुसन्धानका क्रममै छौँ ।' गोलेले आफैंले गोली हानी आत्महत्या गरेको 'घटनाक्रम'ले देखाएको पनि डीआईजी कार्कीले बताए । गोलेको निधारमा गोली लागेको छ ।

घटनाको विस्तृत विवरण आउन बाँकी छ ।