सरकारले जे गर्नुपर्थ्यो, त्यो गम्भीररूपले पूरा गर्ने प्रयास भइरहेको छ : प्रधानमन्त्री दाहाल

‘मैले बझाङ भूकम्पको पनि स्थलगत अवलोकन गरेको छु । यहाँ पनि मुख्य प्रभावित क्षेत्रसहित जाजरकोट र रूकुम पश्चिमको अवलोकन गरेँ,’ प्रधानमन्त्री दाहालले भने, ‘ठूलो मानवीय क्षति भएको छ । हजारौँ घरहरू क्षति भएको मैले प्रत्यक्ष अवलोकन गरेर आएको छु । आजको दिनमा सरकारले जे गर्नुपर्थ्यो, त्यो गरिएको छ । सरकार यो विषयमा गम्भीर छ ।’

प्रधानमन्त्री दाहालले शनिबार उद्धार र उपचारको काम भइरहेको भन्दै आइतबार मन्त्रिपरिषद्को बैठक बस्ने र राहत तथा पुनर्स्थापनाको काम अघि बढाउने बताए ।

‘आज दिनभर घाइतेहरूको उद्धार भएको छ । मैले आफैँ पनि घाइतेहरूलाई लिएर उद्धार गरेको छु । अहिले चिकित्सक र औषधोपचारको प्रबन्ध पनि भएको छ,’ उनले भने, ‘तीन वटा हेलिकप्टरले दिनभर उद्धारको काम गरेका छन् ।’

उनले जाजरकोट भूकम्पबाट पीडितहरूको राहतका लागि देशभरि र विदेशबाट समेत सहानूभुति र स्वस्फूर्तरुपमा राहतका लागि समेत वचनबद्धता आइरहेकोप्रति खुसी प्रकट गर्दै संकटको घडीमा सरकारलाई सबैको साथ आवश्यक हुने बताए ।