ट्राफिक प्रहरीले अनावश्यक केरकार गर्‍यो : बालेन्द्रको सचिवालय

महानगरप्रमुखको सचिवालयले विज्ञप्ति जारी गर्दै सुत्केरी अवस्थामा रहेकी मेयर शाहकी श्रीमती सविना काफ्ले सवार गाडी ट्राफिक प्रहरीले चेकजाँच गरेको र त्यसक्रममा 'अनावश्यक केरकार' गरिएको उल्लेख गरेको छ ।

'आफ्नो स्वास्थ्य परीक्षण र एनआइसीयुमा भर्ना रहेको शिशुलाई स्तनपान गराइ फर्किने क्रममा रातको करिब ९ बजे कोटेश्वरमा ट्राफिक प्रहरीहरू सवारी चेकजाँच गर्दै थिए,' विज्ञप्तिमा भनिएको छ, 'जाँचका क्रममा परेको हाम्रो सवारी साधनका विषयमा प्रहरीले सोधेको प्रश्नमा सवारी चालकले, विशेष परिस्थितिमा उक्त गाडी प्रयोग गर्नु परेको व्यहोरा जानकारी गराए । सवारीचालकले आफ्नो परिचय पत्र देखाए, सार्वजनिक बिदाको दिन प्रयोग गर्न बनाइने परमिट भएको तर त्यस समय उक्त गाडीमा नबोकेको विषय समेत अनुरोध गरे । नगर प्रमुख सहितको परिचय खुलाए पश्चात् प्रहरीको व्यवहार झन् बढी आक्रामक हुन गएको थियो ।'

ट्राफिकले श्रीमती चढेको गाडी रोकेपछि मेयर शाहले दिए सिंहदरबार जलाउने धम्की

ट्राफिक प्रहरीले करिब ७ मिनेट उक्त सवारी साधनलाई रोकेर राखेको मेयर शाहको सचिवालयले विज्ञप्तिमा उल्लेख गरेको छ । 'सवारी जाँच गर्ने विधि र प्रक्रिया अबलम्ब नगरी प्रहरीले ढोका खोल, के हो ? कहाँ हो ? यस्तो त्यस्तो गर्ने भन्दै पछिल्लो सिटमा सवार सुत्केरी सविना काफ्लेलाई अनावश्यक केरकार गरेको थियो । प्रसव पीडा र शारीरिक समस्यामा एवम् नवजात शिशुको स्वास्थ्य अवस्थाले चिन्तित रहेकी महिलामाथि कर्तव्य पालना गर्न बसेका प्रहरीबाट गरिएको यस प्रकारको असभ्य व्यवहार अत्त्यन्त निन्दनीय तथा खेदजनक छ,' विज्ञप्तिमा उल्लेख छ ।

मेयर शाहको सचिवालयले त्यस क्रममा ट्राफिक प्रहरीले मादक पदार्थ सेवन गरेको आरोप पनि लगाएको छ । 'कर्तव्य पालनाका क्रममा मादक पदार्थ, गुट्खा लगायत सूर्तीजन्य पदार्थ सेवन गर्ने, सवारी साधन जाँच गर्दा रुखो बोलेर हप्काई दप्काइ गर्ने व्यवहार भयो,' शाहको सचिवालयले भनेको छ, 'कानुनको उल्लङ्घन भएको भए चिट काटेर आवश्यक कारबाही गर्ने वैधानिक बाटो छोडेर सविना काफ्लेलाई अस्वभाविक प्रश्न गरिएको थियो ।' उक्त घटनाबारे गृह प्रशासनले भ्रमक सूचना दिएको पनि शाहको सचिवालयको भनाइ छ ।

मेयर शाहको सचिवालयले 'गलत आचरण भएका केही प्रहरीहरू माथि निगरानी गर्न, गल्ती गर्नेलाई कानुनी कारवाहीको प्रक्रियामा ल्याउन' पनि आग्रह गरेको छ ।

शनिबार साँझ भएको उक्त घटनापछि मेयर शाहले सामाजिक सञ्जालमा काठमाडौं महानगरपालिकाको सवारी साधन आगामी दिनमा रोकिए 'सिंहदरबारमा आगो लगाइदिन्छु' भनेर धम्कीपूर्ण भाषामा लेखेका थिए । जसको चौतर्फी विरोध भएको थियो । शाहको सचिवालयले जारी गरेको विज्ञप्तिमा भने उक्त अभिव्यक्ति किन आयो भन्नेबारे केही उल्लेख छैन ।