समर्थन जुटाउँदै ओली

कांग्रेस केन्द्रीय समितिको बैठक चलिरहेका बेला अध्यक्ष ओली, नेता माधवकुमार नेपाल र सचिव प्रदीप ज्ञवालीले सभापति सुशील कोइरालालाई भेटेर बिहीबार औपचारिक पत्र दिए । विगतका सहमति, सम्झौता पालनामा ध्यानाकर्षण गराउँदै एमाले नेतृत्वमा सरकार बनाउन र सघाउन कांग्रेसलाई आग्रह गरेको सचिव ज्ञवालीले जानकारी दिए ।
कांग्रेसको केन्द्रीय समिति बैठकमा आफ्नै नेतृत्वमा सरकार बनाउनुपर्ने आवाज उठिरहेको छ । बैठककै समयमा ओलीसहितका नेता बालुवाटार पुगेका थिए । बैठकबाट बाहिर आएर कोइरालाले पत्र बुझेका थिए । त्यहाँ कोइरालाले सहमतिअनुसारै अघि बढ्ने कांग्रेसको चाहना रहेको बताउँदै पार्टीबाट संस्थागत निर्णय गर्ने जानकारी दिएका थिए ।
'हामीले १६ बँुदे र ७ बुँदे सहमतिको सन्दर्भ कांग्रेसलाई स्मरण गराएका छौं,' एमाले सचिव ज्ञवालीले कान्तिपुरसँग भने, 'संविधानअनुरूप सहमतीय सरकार नभए पनि बहुमतीय प्रक्रियाभित्र अधिकतम सहमति जुटाउने प्रयासमा हामी छौं ।'
जेठ २५ को १६ बुँदे र कांग्रेस र एमालेबीच सरकार निर्माण गर्दा ०७० माघ २५ मा भएको ७ बुँदेले कांग्रेसपछि एमालेलाई नेतृत्व दिने भद्र सहमति भएको थियो । त्यही सहमतिअनुसार अघि बढ्न एमालेले कांग्रेसलाई ध्यानाकर्षण गराएको हो । विगतका सहमतिअनुसार अघि बढदै संविधानको कार्यान्वयन र चुनौतीको सामना गर्न सकिने भन्दै प्रमुख दलहरूबीचको एकता र सहकार्य टुटाउन नहुने धारणा एमाले नेताहरूले राखेका थिए ।
एमालेले बिहीबारै एमाओवादी अध्यक्ष पुष्पकमल दाहाललाई उनकै निवास लाजिम्पाट पुगेर सहमतिसाथ अघि बढ्ने आग्रहको पत्र बुझाएको थियो । संविधान जारी भएपछिका चुनाैती सामना गर्न मिलेर जानुपर्ने पक्षमा रहेको भन्दै एमाओवादी नेताहरूले सहयोग गर्ने आश्वासन दिएका थिए । 'हामी आफ्नो निर्णयमा दृढ नै छौं । कांग्रेसले पनि सकारात्मक निर्णय गरोस् भन्ने चाहन्छौं,' एमाओवादी अध्यक्ष दाहालले एमाले नेताहरूलाई भने, 'हामी शुक्रबार स्थायी समितिको बैठकबाट औपचारिक छलफलबाट निर्णय गर्छौं ।'
एमाले नेताहरूले राप्रपा नेपालको धुम्बराहीस्थित कार्यालयमा गएर पत्र दिएका थ्ािए । अध्यक्ष ओली, वरिष्ठ नेता झलनाथ खनाल, माधव नेपाल, विद्या भण्डारी र ज्ञवालीले राप्रपा नेपाल अध्यक्ष कमल थापासँग कुरा गरेका थिए । भेटमा थापाले प्रमुख तीन दल मिलेर जाँदा हालका चुनौती सामना गर्न सकिने भएकाले एकता नटुटाउन आग्रह गरेका थिए । 'सकेसम्म तीन दलकै सरकार बनोस् तर राप्रपा नेपाल नै चाहिने भयो भने हामी त्यसबेलामा बाधक बन्दैनौं,' थापाको भनाइ उद्धृत गर्दै राप्रपा नेपालका सहप्रवक्ता मोहन श्रेष्ठले भने । थापाले रचनात्मक विपक्षमा बस्ने सोचाइमा रहेको बताएका थिए । तर, तीन दलबीचको सहकार्य नभए सरकारमा सामेल हुने संकेत दिए । संविधान निमर्ाणमा एमालेले खेलेको भूमिका निणर्ायक रहेको भन्दै थापाले आवश्यक पर्दा पार्टीको बैठकबाट निर्णय गर्ने जानकारी ओलीलगायतका नेतालाई दिएका थिए ।
एमालेले तीन प्रमुख दललाई लेखेको औपचारिक पत्रमा 'संविधानको प्रभावकारी कार्यान्वयन, राष्ट्रिय हित स्वाभिमानको रक्षाका लागि राष्ट्रिय एकता निर्माण, भूकम्पपछिको पुनर्निमर्ाण र जनतालाई परिवर्तनको अनुभूति दिलाउन आर्थिक समृद्धि गरी चारवटा कार्यभार पूरा गर्न अधिकतम सहमतिको सरकार आवश्यक परेको' उल्लेख  छ ।
संसदमा रहेका अन्य दलहरूलाई पनि शुक्रबार पत्र पठाउने तयारी गरिएको सचिव ज्ञवालीले जानकारी दिए । आन्दोलनरत दलहरूलाई समेत आग्रह गरिनेछ । एमालेले प्रमुख दल कांग्रेससहितको समर्थनमा सरकार बन्ने अपेक्षा गरेको छ । कांग्रेस आफैं नेतृत्वका लागि अघि सरे पनि संसदभित्रको बहुमत आफ्नो पक्षमा जुट्ने विश्वास एमालेको छ । तेस्रो ठूलो दल एमाओवादी अध्यक्ष पुष्पकमल दाहालले एमाले अध्यक्ष ओली नै प्रधानमन्त्री बन्ने विगतको सहमति भन्दै उनको पक्षमा माहोल बनाइरहेको र तीन दल एक ठाउँमा नहुने अवस्थामा राप्रपा नेपाल पनि सरकारमा सहभागी हुने अवस्था रहेकाले बहुमत पुर्‍याउन सकिने विश्वास एमाले नेताहरूको छ । त्यस्तै कतिपय साना दलहरूबाट पनि सहयोगको आश्वासन पाएको एमाले नेताहरूको दाबी छ ।