पोखरा — माछापुच्छ्रे र जनता बैंकबीच मर्जर हुने भएको छ । ६ महिनाभित्र प्रक्रिया पूरा गर्ने गरी सोमबार यहाँ माछापुच्छ्रेका अध्यक्ष वीरेन्द्रप्रसाद महतो र जनताका अध्यक्ष उदय नेपाली श्रेष्ठबीच सहमतिपत्रमा हस्ताक्षर भयो ।

राष्ट्र बैंकले वाणिज्य बैंकहरूको चुक्ता पुँजी ८ अर्ब बनाउनुपर्ने नीति ल्याएपछि उक्त पुँजी बनाउने उद्देश्यसाथ मर्जर भएको सहमतिको हस्ताक्षरपछि आयोजित पत्रकार सम्मेलनमा जनाइयो । यसअघि यही असोज ३ मा दुवै बैंकबीच मर्जर गर्ने प्रारम्भिक सहमति भएको थियो ।

मर्जरपछि बैंकको नाम माछापुच्छ्रे नै रहने बैंकको सञ्चालक समितिमा माछापुच्छ्रेकै अध्यक्ष वीरेन्द्रप्रसाद महतो रहने र ९२ शाखा तथा ९८ एटीएम सेवा पुग्ने मर्जर समितिले जनाएको छ । ६ महिनाभित्र  मर्जर हुने गरी महतो संयोजक रहेको ६ सदस्यीय संयुक्त मर्जर समिति पनि गठन गरिएको छ ।

महतो र श्रेष्ठले मर्जरको ढोका खुलै रहेको भन्दै अन्य विकास बैंक र फाइनान्ससँग पनि मर्जर हुन सक्ने बताए । पुँजी बढाउन मर्जर एउटा प्रक्रिया रहेको भन्दै उनीहरूले जलविद्युत् लगायतका ठूलाठूला आयोजनामा लगानी गर्ने नीति पनि लिइएको जनाए ।  

मर्जरपछि बैंकको चुक्ता पुँजी ५ अर्ब ७१ करोड पुग्नेछ । हाल माछापुच्छ्रेको चुक्ता पुँजी २ अर्ब ९५ करोड र जनताको २ अर्ब ६ करोड रहेको छ ।

गत असार मसान्तसम्मको अपरिष्कृत वित्तीय विवरणअनुसार माछापुच्छ्रेको जगेडा कोष १ अर्ब ७ करोड, निक्षेप ४४ अर्ब २० करोड, कर्जा लगानी ३४ अर्ब ८२ करोड र खुद नाफा ६१ करोड छ । यसैगरी जनताको जगेडा कोष २९ करोड, निक्षेप २२ अर्ब ९२ करोड, कर्जा लगानी १८ अर्ब ५१ करोड र नाफा १५ करोड छ । माछापुच्छ्रेको निष्क्रिय कर्जा ० दशमलव ६४ प्रतिशत र जनताको १ दशमलव ६ प्रतिशत मात्रै छ ।