भन्सार नाकामा मधेसी मोर्चाको धर्ना

वीरगन्जः  भारतसँगको प्रमुख नाकामा मोर्चाका कार्यकर्ताहरु त्रिपाल टाँगेर बसेका छन् । सीमा क्षेत्रमा धर्नामा बसेकालाई भारतीय सहर रक्सौलका बासिन्दाले खाना र नास्ताको व्यवस्था गरेका थिए । दुई सीमावर्ती सहर वीरगन्ज र रक्सौलबीचको दसगजा क्षेत्रमा रहेको मितेरी पुलमा बिहीबारदेखि संयुक्त लोकतान्त्रिक र संघीय समावेशी मधेसी मोर्चाका नेता तथा कार्यकर्ताले धर्ना सुरु गरेका हुन् । पहिलो दिन आवागमन सुचारु गराउन प्रहरीले हटाउन खोज्दा झडप भएको थियो । शुक्रबार झडप नभए पनि बिहानैदेखि आन्दोलनकारी पुलमा त्रिपाल टाँगेर बसेका छन् ।

जनकपुर- संयुक्त लोकतान्त्रिक मधेसी मोर्चाले शुक्रबार सीमावर्ती जटही नाका घेराउ गरेको छ । मोर्चा सम्बद्ध नेता कार्यकर्ताले घेराउ गरेपछि सवारी आवागमन ठप्प भएको थियो । जनकपुर-जयनगर रेल सेवा स्थगित भएयता जटही नाकाबाटै मालसामान पैठारी हुँदै आएको थियो ।
महोत्तरी - मधेसी मोर्चाका नेता कार्यकर्ताले मलिवारास्थित मूल भन्सार नाकालगायतका स्थानमा धर्ना दिए । उनीहरूले दशगजा नजिक मूल सकडमा पाल टाँगेर शुक्रबारदेखि धर्ना सुरु गरेका हुन् । तराई मधेस सद्भावना पार्टीकी केन्द्रीय उपाध्यक्ष रानी शर्मा र सद्भावना पार्टीका केन्द्रीय सदस्य धर्मेन्द्र राय पनि धर्नामा छन् ।
मोर्चा कार्यकर्ताका अनुसार मटिहानी र समसी छोटी भन्सारमा समेत यस्तै धर्ना दिइएको छ । आन्दोलनरत मोर्चा कार्यकर्ता सुदीप झाका अनुसार मलिवारामा सद्भावना पार्टी र संघीय समाजवादी फोरमका कार्यकर्ताले धर्ना दिएका छन् । त्यस्तै छोटी भन्सार मटिहानीमा तमलोपा र समसीमा तराई मधेस सद्भावना पार्टीले धर्ना दिएको छ । सर्लाहीको मलंगवा र रौतहटको गौरको सीमा क्षेत्रमा पनि मोर्चा कार्यकर्ताले धर्ना दिएका छन् ।