टीकापुर घटनामा पूर्वलडाकु संलग्न : मानवअधिकार आयोग
काठमाडौं — राष्ट्रिय मानव अधिकार आयोगले कैलालीको टीकापुरमा ८ जना प्रहरीको हत्या भएको घटनामा माओवादीका पूर्व लडाकुहरुको संलग्नता देखिएको जनाएको छ ।
‘जोशीपुर गाविसबाट आएका आन्दोलकारीहरूमा तत्कालीन नेकपा माओवादीका पूर्व लडाकुहरू पनि समावेश भएको बुझिएको छ । आन्दोलनमा अधिकांश युवा उमेर समूहका व्यक्तिहरू सहभागी रहेको बुझिएको छ’ आयोगको विज्ञप्तिमा भनिएको छ ।
आयोगले बिहीबार जारी गरेको विज्ञप्तीमा घरेलु हतियार भाला, खुकुरी र बन्चरो प्रयोग गरी एसएसपी लक्ष्मण न्यौपाने सहितका सुरक्षाकर्मीको हत्या गरिएको उल्लेख गरेको छ ।
‘प्रहरीतर्फबाट प्रदर्शनकारीहरूमाथि अश्रुग्याँस र गोली प्रहार हुन थालेपछि आक्रोशित हुँदै प्रदर्शनकारीहरूले प्रहरीको हत्या गरेको बुझिएको छ,’ आयोगका सदस्य एवं प्रवक्त मोहना अन्सारीद्वारा जारी विज्ञप्तीमा भनिएको छ– ‘सामाजिक सद्भाव बिग्रिन नदिन थरुहटका कार्यकर्तालाई आग्रह गर्दा गर्दै एसएसपी न्यौपाने सहितका सुरक्षाकर्मीमाथि आक्रमण भएको छ ।’
‘आफनै घरआँगनमा बसिरहेको समयमा खेतबारीबाट गोली प्रहार भई डेढ वर्षीय दुधे बालकको हत्या भएको अनुगमनका क्रममा पाइएको’ आयोगले जनाएको छ ।
आयोगले उक्त घटनापछि सभासद्सहित सर्वसाधारणको घरमा भएको आगजनी सुरक्षा संवेदनशीलता विपरीत देखिएको भन्दै घटनाको निष्पक्ष छानवीन गरी दोषीलाई कानुनी दायरामा ल्याउन, जनताको सुरक्षा गर्न, मृतक परिवारलाई राहत तथा क्षतिपूर्ति दिन, घाइतेहरुको उपचारको व्यवस्था मिलाउन सरकारको ध्यानाकर्षण गराएको छ । साथै आयोगले टीकापुर जस्तो घटनाको पुनरावृति हुन नदिन तर्फ सजग रहन सरकार र आन्दोलनकारी पक्षलाई आग्रह गरेको छ ।
