एमालेले सरकारबाहिर बस्नै नसक्ने मानसिकता राख्यो : अर्थमन्त्री महत

संसद् भनेको समसामयिक विषयमा सघन रूपमा छलफल गर्ने,ऐन कानुनहरु बनाउने थलो भए पनि त्यस्तो बन्न एमालेले नदिएको उनले बताए । सरकारले संघीयताको मर्मअनुसार ऐन कानुन बनाउने संसद्मा विधेयक प्रस्ताव गर्ने तयारीमा भए पनि एमालेले संसद् अवरुद्ध गर्दा नसकिएको उनको भनाइ छ ।

‘संसद् भनेको जनताले निर्वाचित गरेका जनप्रतिनिधिहरूले समसामयिक विषयमा गहन रूपमा छलफल गर्ने थलो हो । ऐन,कानुनहरू बनाउने थलो हो । कतिपय ऐनहरू सरकारले संघीय संरचनाअनुसार परिमार्जित गर्नुपर्ने छ । संघीय व्यवस्थालाई बलियो बनाउँछौं । धेरै कानुनी विधेयकहरू संसदमा प्रस्ताव तयारीमा सरकार लागेको छ । तर प्रतिपक्ष एमालेले संसद्मा छलफल गर्न दिएन । हरेक पटक केही न केही बहानामा संसदलाई बन्दी बनाइराखियो भने यी कुराहरू अगाडि बढ्दैनन्, अर्थमन्त्री महतले भने ।

कांग्रेस प्रतिपक्षमा बस्दा कहिल्यै पनि संसद् अवरुद्ध गर्ने काम नगरेको अर्थमन्त्रीको भनाइ छ । 'नेपाली कांग्रेस जब विपक्षमा थियो । कहिल्यै पनि अनावश्यक रूपमा संसद्लाई अवरुद्ध गर्ने काम गरेनौं । जे कुरा हो संसद्भित्रै राख्ने हो । संसदभित्रै वहस गरेर निष्कर्ष निकाल्ने हो । नेकपा एमालेलाई के आग्रह गर्न चाहन्छौं भने सहज रूपमा सरकार बन्ने बनाउने कुरा संसद्को सर्वाधिकार हो । सांसदहरूले जसलाई बहुमतले सरकार बनाउँछ त्यसलाई सहज रूपमा स्वीकार गर्नुपर्छ । सरकारमा नहुनेबित्तिकै त्यसलाई असहज बनाउने र सरकारभन्दा बाहिर बस्न सकिँदैन भन्ने मानसिकता राम्रो भएन ।'