२८.१२°C काठमाडौं
काठमाडौंमा वायुको गुणस्तर: १९२

भिड्दै परम्परागत प्रतिद्वन्द्वी

एसीसी प्रिमियर कप ट्वान्टी–२० विजेताले अर्को वर्ष हुने एसिया कपमा प्रवेश पाउने हुनाले दुवै टोली नेपाल र यूएई पूर्ण शक्तिसाथ उत्रने 
विनोद पाण्डे

काठमाडौँ — ठिक दुई वर्षपछि मस्कटमा नेपाल र यूएई आमनेसामने हुँदै छन् । यसपालि यी दुई टिम एसीसी प्रिमियर कप ट्वान्टी–२० क्रिकेटको सेमिफाइनल खेल्दैछन् । प्रतियोगिता विजेताले अर्को वर्ष हुने एसिया कपमा प्रवेश पाउने हुनाले दुवै टोली पूर्ण शक्तिसाथ उत्रने निश्चित छ ।

भिड्दै परम्परागत प्रतिद्वन्द्वी

२६ महिनाअघि नेपाल र यूएई मस्कटस्थित अल अमेरातमा एक आपसमा भिड्दा पनि समीकरण यस्तै थियो । ट्वान्टी–२० विश्वकप छनोटको सेमिफाइनल खेल थियो । विजेता टोली फाइनल पुग्दै ट्वान्टी–२० विश्वकपमा छनोट हुने अवसर थियो । सन् २०२२ को फेब्रुअरी २२ मा भएको खेल नेपालको पक्षमा रहेन । नेपाल ट्वान्टी–२० विश्वकपमा पुग्नबाट वञ्चित भयो ।

यूएईले पहिलो ११ ओभरमा १०२–२ को स्कोर बनाए पनि नेपालले राम्रो पुनरागमन गरेको थियो । जसरी यूएईले सुरुआत गरेको थियो, त्यस हिसाबमा यूएईलाई १७५–७ को स्कोमा रोक्नु नेपालको सफलता थियो । तर एउटा टिमको रूपमा खेल्न नसकिरहेको नेपाल १८.४ ओभरमा १ सय ७ रनमै अलआउट भयो । नेपाललाई रोक्दै यूएई ट्वान्टी–२० विश्वकपमा पुग्न सफल भयो ।

त्यसको बदला नेपालले लिइसकेको छ । नोभेम्बरमा काठमाडौंमा सम्पन्न ट्वान्टी–२० विश्वकपको एसिया छनोटमा नेपाल सेमिफाइनलमा यूएईविरुद्ध आरामदायी ८ विकेटले जित निकाल्दै ट्वान्टी–२० विश्वकपमा पुगिसकेको छ । आउँदो जुनमा नेपालले अमेरिका गएर ट्वान्टी–२० विश्वकप खेल्दै छ । ओमानमा अहिले भइरहेको एसीसी प्रिमियर कप नेपालका लागि त्यसको राम्रो तयारी पनि हो ।

नेपाल र यूएई दुवैको हकमा एसिया कपमा छनोट हुनु त्यत्तिकै महत्त्वपूर्ण छ । गत वर्ष नेपालले काठमाडौंमै यूएईलाई फाइनलमा हराएर पहिलो पटक एसिया कपमा पुग्दै भारत र पाकिस्तानसॅग खेल्ने अवसर पाएको थियो । त्यो एकदिवसीय संरचनाको थियो । नेपाल पहिलो पटक ट्वान्टी–२० एसिया कपमा छनोट हुने दाउमा छ ।

ट्वान्टी–२० को यो यात्रा त्यति सजिलो छैन । नेपाल र यूएई दुई परम्परागत प्रतिद्वन्द्वी हुन् । हालैका वर्षमा नियमित खेल्दै आएका यी दुवैका लागि एकअर्कामाथिको जितले ठूलो महत्त्व राख्ने गर्छ । विशेष गरी एसिया कप छनोटजस्तो प्रतियोगितामा पाएको सफलताले टिमको मनोबल नै उच्च पार्ने गर्छ । पछिल्लो एक वर्षमा यूएईलाई एसिया कप छनोट र ट्वान्टी–२० विश्वकप छनोटमा पराजित गरेकाले नेपाल उच्च मनोबलका साथ खेलिरहेको देखिन्छ ।

प्रिमियर कप ट्वान्टी–२० मा नेपाल शतप्रतिशत विजयसाथ सेमिफाइनल पुगेको हो । नेपालले समूह चरणमा मलेसिया, कतार, हङकङ र साउदी अरेबियामाथि विजय हात पारेको थियो । नेपालले जस्तो प्रतिद्वन्द्वीसँग खेल्छ, त्यस्तै खेल देखाउने गरेको छ । प्रतियोगितामा सहभागी टोलीले निकै आक्रामक ब्याटिङ देखाइरहँदा नेपालले आफ्नो स्वाभाविक खेल अझै खेल्न बाँकी छ । सेमिफाइनलसम्म खासै कठिन नभएको नेपाललाई यूएईविरुद्ध आफ्नो स्वाभाविक खेल देखाउने अवसर आएको छ ।

कतारविरुद्धको दोस्रो खेलमा दीपेन्द्रसिंह ऐरीले अन्तिम ओभरमा लगातार ६ छक्का प्रहार गरेका थिए । गुलशन झाले मलेसिया र साउदी अरेबियाविरुद्ध निर्णायक क्षणमा टिमको आवश्यकताअनुरुप ब्याटिङ गरे । दीपेन्द्र मलेसिया र कतारविरुद्ध तथा गुलशन साउदी अरेबियाविरुद्ध प्लेयर अफ द म्याच चुनिएका थिए । दीपेन्द्रको यही प्रर्दशनका कारण उनी ट्वान्टी–२० अन्तर्राष्ट्रिय अलराउन्डर विश्व वरीयताको ११ औं स्थानमा उक्लिसकेका छन् ।

माथिल्लो क्रमका ब्याटर वृत्या अरविन्दविनाको यूएई विगतको तुलनामा केही कमजोर देखिएको छ । कुवेतविरुद्धको पहिलो खेलमा टोली पराजय नजिक पुगेर जोगिएको थियो । त्यसपछि बहराइनलाई हराएको यूएई तेस्रो खेलमा भने आयोजक ओमानसँग पराजित भयो । समूह चरणको अन्तिम खेलमा कम्बोडियालाई हराएर यूएईले सेमिफाइनलमा स्थान पक्का गरेको हो ।

बलिङमा यूएईले सन्तुलन मिलाउन सकिरहेको छैन । यूएईविरुद्ध कुवेतले १७८–८, बहराइनले १९९–८ को स्कोर बनाएको थियो । यूएई र ओमानको खेल वर्षाले प्रभावित रह्यो । यूएईले दिएको १५ ओभरमा बनाउनुपर्ने १ सय ४३ रनको लक्ष्य ओमानले १२.४ ओभरमै पूरा गरेको थियो । ओमानले अर्को सेमिफाइनलमा हङकङको सामना गर्नेछ । कम्बोडियालाई भने यूएईले ७६ रनमा अलआउट गरी त्यो लक्ष्य ५.१ ओभरमै पूरा गरेको थियो ।

यूएईको ब्याटिङविरुद्ध भने नेपाली बलरले आफ्नो उत्कृष्ट दिनुपर्ने हुन्छ । आसिफ खानले ४ खेलमा २ सय ११, अलिसान सराफुले १ सय ८९ र कप्तान मोहम्मद वासिमले १ सय ५८ रन बनाइसकेका छन् । वासिमको १८८, सराफुको १८७ र आसिफको १७१ भन्दा माथिको ब्याटिङ स्ट्राइकरेट छ । प्रतियोगितामा नेपालबाट आसिफ शेखले १ सय २६ र दीपेन्द्रले १ सय १ रन बनाएका छन् । आसिफको १२९ र दीपेन्द्रको २४६ माथिको स्ट्राइक रेट छ ।

कुशल भुर्तेल र कुशल मल्लजस्ता राम्रा स्ट्राइक रेट भएका ब्याटर यूएईविरुद्ध लयमा फर्किनु नेपालको आवश्यकता हो । भुर्तेलले ६८ र मल्लले ४४ रनमात्र बनाउन सकेका छन् । नेपाली प्रमुख बलरहरूले राम्रो गर्दै आएका छन् । अविनाश बोहराले ७, दीपेन्द्रले ६ र ललितले ५ विकेट लिएका छन् । दीपेन्द्र र ललितले प्रतिओभर ६ भन्दा केहीमाथि र अविनाशले ८ मुनिले मात्र रन खर्चेका छन् । प्रमुख दुई बलर सोमपाल कामी र करण केसी भने लयमा आउन बाँकी छ । सोमपालले ३ खेलमा कुनै विकेट लिन सकेका छैनन् । उनलाई साउदीसँग खेलाइएको थिएन । करणले पनि ३ खेलमा ३ विकेटमात्र लिन सकेका छन् ।

बलिङ प्रशिक्षकमा वेस्ट इन्डिजका रड एस्टविकलाई ल्याएयता नेपालको बलिङमा उल्लेखनीय सुधार आएको छ । विशेष गरी नेपालको प्रमुख समस्या डेथ बलिङमा नेपालले अहिले राम्रो गर्दै आएको छ । यूएईविरुद्ध यही सुधारको प्रदर्शनलाई निरन्तरता दिनु नेपाली बलरसामु चुनौती रहनेछ ।

प्रकाशित : वैशाख ७, २०८१ ०६:४३
प्रतिक्रिया
पठाउनुहोस्
जनताको राय

सरकारले ल्याएको आर्थिक वर्ष २०८१/०८२ को बजेट कस्तो लाग्यो ?