शान्ति प्रक्रियालाई पूर्णता दिन राष्ट्रिय सहमति जरुरी छ : महासचिव गुरुङ 

सोमवार बेपत्ता योद्धा समाज परिवार नेपालले काठमाडौंमा गरेको एक कार्यक्रममा बोल्दै महासचिव गुरुङले विश्वमा शान्ति नचाहने शक्तिहरुले नेपालमा पनि शान्ति प्रक्रियालाई भड्काउने प्रयास गरिरहेको दाबी गरे ।

मुलुकको आन्तरिक मामिलामा चलखेल गरेर उनीहरुले शान्ति प्रक्रियाको बाँकी कामलाई अघि बढाउन नदिएको महासचिव गुरुङले दाबी गरे । उनले एउटा वा दुई वटा दलले मात्रै चाहेर मुलुकको शान्ति प्रक्रियाको कामले पूर्णता नपाउने बताए ।

महासचिव गुरुङले भने, 'मुलुकको परिस्थितिको सन्दर्भमा सबै दलहरुबीच सहमति हुन जरुरी छ । सहमति हुन सकिराखेको छैन । मुलुकमा राष्ट्रिय सहमतिको जरुरी छ । तर सहमति हुने अवस्था देखिरहेको छैन । एउटा या दुईटा दलले चाहँदैमा मात्रै सहमति भइहाल्ने अवस्था पनि छैन ।'

उनले देशमा भइराखेको शान्तिसमेत भंग गरेर अशान्तितर्फ जान चाहिरहेको आभास हुन थालेको बताए । उनले दलहरुबीच राष्ट्र र राष्ट्रियताको सवालमा समान धारणा बनाएर अघि बढ्नुपर्ने खाँचो रहेको बताए ।