चिकित्सक भक्तमान श्रेष्ठको अपहरणमा संलग्न तामाङ १३ वर्षपछि पक्राउ
नुवाकोट — चिकित्सक भक्तमान श्रेष्ठको अपहरणमा संलग्न एकजना कारागार चलान भएका छन् । १३ वर्षपछि विदुर नगरपालिका १२ का ३९ वर्षीय सुब्बा तामाङ (लुप्पा) पक्राउ परेका हुन् ।
जिल्ला प्रहरी कार्यालयका प्रहरी नरीक्षक (इन्स्पेक्टर) पुष्प दर्लामीले तामाङलाई शनिबार पक्राउ गरी आइतबार नुवाकोट अदालतमा पेस गरिएको र अदालतको आदेशअनुसार जिल्ला कारागार नुवाकोटमा पठाइएको बताए ।
चिकित्सक श्रेष्ठ बीपी कोइराला मेमोरियल क्यान्सर अस्पताल भरतपुर, चितवनका तत्कालीन कार्यकारी निर्देशक थिए । अपहरण काण्डमा दोषी ठहरिएका निज तामाङ आफन्तको घरमा लुकिरहेको अवस्थामा पक्राउ गरिएको प्रहरीले जनाएको छ ।
जिल्ला प्रहरी कार्यालय नुवाकोटका अनुसार घटनापछि फरार रहेका तामाङलाई पक्राउ गरेर फैसला कार्यान्वयनको लागि अदालत पेस गरिएपछि कारागार चलान भएका हुन् ।
अपहरण तथा शरीर बन्धक मुद्दामा चितवन जिल्ला अदालतले निज तामाङलाई दोषी ठहर गर्दै १३ वर्ष कैद र १ लाख रुपैयाँ जरिवानाको फैसला गरेको थियो । निजलाई २०६७ साल जेठ ४ गते चिकित्सक श्रेष्ठको अपहरणमा संलग्न तामाङसहित छ जनालाई अदालतले २०६९ जेठ २४ गते कैदसहित जरिवाना तोकेका थियो ।
चिकित्सक श्रेष्ठको अपहरण र त्यसपछि ३ किलो सुन फिरौती मागेको प्रहरीले जनाएको छ । अपहरणमा निज तामाङसहित नुवाकोटका ३ जना, २ जना काठमाडौंका र २ जना भारतीय रहेको प्रहरीले जनाएको छ ।
प्रकाशित : आश्विन ८, २०८० १०:२३