[अपडेट] भाण्टाबारीमा भारतीय एसएसबीले गोली चलाएको स्वीकार गर्‍यो- समाचार - कान्तिपुर समाचार
कान्तिपुर वेबसाईट
AdvertisementAdvertisement

[अपडेट] भाण्टाबारीमा भारतीय एसएसबीले गोली चलाएको स्वीकार गर्‍यो

गोली चलाउनु जवानको गल्ति : इन्चार्ज रणवीर सिंह
वेदराज पौडेल

इनरुवा — सुनसरीको भण्टाबारीमा आज बिहान आफ्ना जवानहरुबाट गोली चलेको भारतीय सीमा सुरक्षा बल (एसएसबी)का सतना पोष्टका इन्चार्ज रणविर सिंहले स्वीकार गरेका छन् । उनले सुनसरी प्रहरी प्रमुख संजयराज शर्मालाई टेलिफोन गरी घटनामा आफ्ना जवानहरुबाट फायर भएको स्वीकार गरेका छन् ।

अपडेट::

भारतको सुपौल जिल्लाको भीमनगर बजारबाट स्थानियले साइकलमा रसायनिक मल लिएर आउँदै गरेकाबेला दशगजामा रहेको एसएसबीले रोकेपछि विवाद भएको थियो । विवाद बढ्दै गएपछि स्थानियलाई लक्ष्य गरेर एसएसबीले नेपाली क्षेत्र भित्र गोली चलाएको थियो ।

स्थानियका अनुसार भारतीय सुरक्षाकर्मीले नेपालीक्षेत्र भित्र प्रवेश गरि गोली प्रहार गरेको बताएका छन् । एसएसबीका इञ्चार्ज रणवीर सिंहले आफ्ना जवानहरुलेगोली चलाउनु गल्ति भएकोले छानविन गरी कारवाही समेत गर्ने बताएको नेपाल प्रहरीका एसपी संजयराज शर्माले सिंहलाई उद्धृत गर्दै बताएका छन् ।
 
घटनाको प्रकृति हेर्दा पनि एसएसबी नेपाली क्षेत्र भित्र प्रवेश गरेको देखिएको सुरक्षा स्रोतले दाबि गरेको छ । एसएसबीको गोली लागि घाईते भएकाहरुको उपचार धरान स्थित वीपी कोइराला स्वास्थ विज्ञान प्रतिष्ठानको सघन उपचारकक्षामा भइरहेको छ । घाईते हरिपुर–७ का अशोक यादवको छातीको दाहिने भागमा गोली लागेको छ । उनको अवस्था चिन्ताजनक रहेको प्रहरीले जनाएको छ ।
 
अर्का घाइते नरेश यादवको बाँया कम्मरमा गोली लागेको छ । अर्का घाईते सरोज यादवको दाहिने तिघ्रामा गोली लागेको छ । मनोज यादवको भने इनरुवा अस्पतालमा उपचार गरी उनी घर फर्कीएका छन् । घटनाबारे थप अनुसन्धान भइरहेको प्रहरीले जनाएको छ ।

...

सुनसरीको भाण्टाबारीमा भारतीय सीमा सुरक्षा फौज (एसएसबी)ले गोली चलाउँदा स्थानीय चार जना नेपाली गोली लागी घाइते भएका छन् ।
 
हरिपुर गाविस–७ मा पर्ने भाण्टाबारी पूर्व दशगजा क्षेत्रमा एसएसबीले बिहान साढ ६ बजे गोली चलाएको थियो । एसएसबीको गोली लागी घाइते हुनेमा हरिपुरकै आशोक यादव, नरेश यादव, मनोज यादव र सरोज यादव रहेको सुरक्षा स्रोतले जनाएको छ । 

गोली लागि घाइतेलाई उपचारको लागि जिल्ला अस्पताल इनरुवा र विपी कोइराला स्वास्थ्य विज्ञान प्रतिष्ठान धरान लगिएको छ ।

घटनाको पुष्टि गर्दै प्रमुख जिल्ला अधिकारी रविलाल पन्थले मल ल्याउने क्रममा क्यारियरवालासँग विवाद भएपछि एसएसबीले गोली चलाएको तर गोली स्थानीयलाई लागेको बताए ।

घटनाको थप अनुसन्धान जारी रहेको प्रहरी उपरिक्षक संजयराज शर्माले बताए । 

प्रकाशित : मंसिर ९, २०७२ ०८:२४
प्रतिक्रिया
पठाउनुहोस्

ईयूको साढे १४ अर्ब सहयोग फिर्ता हुने खतरा

चन्द्रशेखर अधिकारी

काठमाडौं — युरोपेली महासंघ (ईयू) ले सहयोग रकम सदुपयोग गर्ने मोडालिटीमा एक महिनाभित्र सम्झौता हुन नसके दाता सम्मेलनमा आफूले घोषणा गरेको सहयोग आउन अप्ठेरो पर्न सक्नेप्रति सचेत रहन सरकारलाई आग्रह गरेको छ ।



मंगलबार बसेको नेपाल–ईयू संयुक्त आयोगको नवौं बैठकमा ईयू प्रतिनिधिले पुनर्निर्माण विधेयक तत्काल अघि बढाएर सहयोग सदुपयोग गर्न नेपाललाई सचेत गराएका हुन् । दलीय स्वार्थका कारण विधेयक संसद्मा अड्किनु आफैंमा चिन्ताको कुरा भएको ईयूको भनाइ छ ।

पुनर्निर्माण विधेयक पारित नभए र सहयोग रकम सदुपयोगसम्बन्धी मोडालिटी तयार नभए ईयूले भूकम्पपछिको पुनर्निर्माणका लागि घोषणा गरेको १ सय मिलियन युरो (करिब १२ अर्ब रुपैयाँ) फिर्ता हुने खतरा बढेको छ ।

यसका साथै एक वर्षअघि घोषित पोषणसम्बन्धी कार्यक्रममा उपलब्ध गराउने भनिएको २२ मिलियन युरो (करिब साढे २ अर्ब रुपैयाँ) समेत अन्तै जान सक्ने अवस्थाप्रति पनि ईयूका प्रतिनिधिले सचेत गराएका छन् । उक्त बैठकमा ईयूले नेपालमा गर्ने सहयोग र विकास कार्यक्रमको मोडालिटीमा छलफल हुने गर्छ ।

ईयूले नेपाललाई दिँदै आएको एक सय २० मिलियन युरो सहयोगलाई तेब्बर गर्दै ३ सय ६० मिलियन (करिब ४२ अर्ब रुपैयाँ) बनाएको छ । आगामी ६ वर्षका लागि घोषणा गरिएको यो सहयोगलाई पनि मंगलबारै औपचारिकता दिइएको छ ।

यो भूकम्पपीडितको पुन:स्थापनामा घोषणा गरिएको बाहेकको नियमित सहयोग हो । उक्त रकम मुलुकको दिगो विकास, प्राविधिक शिक्षा तथा प्रजातन्त्रको सबलीकरणमा सहयोग गर्ने उल्लेख छ । त्यसका विभिन्न मोडालिटी नेपाल सरकारले तयार गरेर दिने र सरकारी मोडलमा रहेर सहयोग अघि बढाउने सहमति यसअघि भइसकेको छ ।

मंगलबारको बैठकमा ईयूले नेपालको पछिल्लो राजनीतिक अवस्थाप्रति गहिरो चासो व्यक्त गर्दै राजनीतिक अस्थिरता र द्वन्द्वको चपेटामा विकास कार्यक्रम प्रभावित हुन नहुने जनाएको छ । स्थायी संयन्त्रबाट कामहरू अघि बढाउनुपर्नेमा ईयूले जोड दिएको छ ।

ईयूका प्रतिनिधिहरूले विकास कार्यक्रम र भूकम्पपीडितको पुनर्बास कार्यक्रम तत्काल अघि बढाउन आग्रह गरेका थिए । जारी संविधानले नेपालको लोकतान्त्रिक अभियानलाई थप बलियो र समावेशी बनाउँदै मुलुक नयाँ युगमा प्रवेश गरेको उल्लेख गर्दै ईयूले नेपालको विकासमा अधिकतम सहयोग र सहकार्य गर्ने उल्लेख गरेको छ ।

बैठकमा राजनीतिक स्तरमा अन्तर्राष्ट्रिय आतंकवाद निर्मलीकरण, जलवायु परिवर्तन, शरणार्थी मामिला, विश्व राजनीतिमा भूमिका र दिगो विकास तथा समान अवसरका काममा अघि बढ्ने सहमति जुटेको छ ।

ठकमा नेपालका तर्फबाट परराष्ट्र सचिव शंकरदास बैरागी र ईयूका तर्फबाट एसिया प्रशान्त क्षेत्रका लागि राजनीतिक मामिला प्रमुख उगो अस्टुटो नेतृत्वको टोली सहभागी थियो । बैठकले नेपाललाई दिने सहयोग र गरिने सहकार्यका बारेमा छलफल गर्दै आगामी ५ वर्षको योजनालाई जोड दिएको हो ।

बैठकमा नेपाली प्रतिनिधिहरूले अहिले राजनीतिक कारण तथा भारतका तर्फबाट भएको नाकाबन्दीका कारण कतिपय काम अघि बढ्न नसकेको र सबै ध्यान त्यसमा केन्द्रित रहेको भन्दै सहयोग नफर्काउन र सकेसम्म कुनै न कुनै परियोजनामा तत्काल उपयोग गर्ने गरी काम अघि बढाउन आग्रह गरेका थिए ।

ईयूले भने राजनीतिक समस्याको सिकारमा भूकम्पबाट पीडित जनता पर्न नहुनेमा जोड दिँदै आएको छ । उसले वर्तमान समस्या द्वन्द्वबाट नभई वार्ताबाट समाधान गर्नसमेत सुझाव दिएको छ । नेपालको समस्या समाधान र विकासमा आफू सधैं सहयोगी रहनेसमेत ईयूले जनाएको छ ।

प्रकाशित : मंसिर ९, २०७२ ०८:१३
पूरा पढ्नुहोस्
प्रतिक्रिया
पठाउनुहोस्
x
×