सबैभन्दा ठूलो शत्रु
मेरो सबैभन्दा ठूलो शत्रु
कहीँ छ भने त्यो म आफैंभित्र छ ।
सर्पले के फणा फिजाउँछ ?
फणा त मभित्रको अर्को मान्छेले फिजाउँछ
र, जीवनको हरेक मोडमा मलाई नै डसेर मरणासन्न बनाइरहन्छ ।
कोही छ मभित्र
जो मेरो खिलाफ मलाई नै प्रयोग गर्न माहिर छ
म भरिएको आधा गिलासको कुरा गर्छु
ऊ प्याच्च गिलास त आधा खाली छ भन्छ
म मभित्रको बुद्धसित बोधिचर्याको कुरा गर्छु
ऊ मभित्रको हिटलर जगाउन हरक्षण अलार्म बजाइरहन्छ
म जाँगर र उत्साहका कविताहरु लेख्न बस्छु
ऊ आलस्य र थकानका शब्दहरु थुपारेर मलाई हैरान बनाउँछ ।
ऊ हल्लाको हिमायती/सकेसम्म आफैंलाई प्रदर्शन गर्छ
म मौनताको पुजारी/सकेसम्म स्वयंलाई लुकाउँछु
एकान्तमा बसेर मैले एकान्त सेवन गरिरहँदा
ऊ कटुवाली पारामा मलाई एकान्तको दुर्व्यसनी घोषित गर्छ ।
मैले जीवनका मन्त्रहरु उच्चारण गरिरहँदा
ऊ छेवैमा बसेर मृत्युको सहनाई बजाइरहन्छ
बदमास पनि यतिसम्मको बदमास छ कि
बारबार मेरो आशाको शिरोच्छेदन गरेर निराशाको टाउको जोडिरहन्छ ।
दुनियाको बाल मतलब !
मिलन हुँदा
म चिहानघारीमा समेत प्रेमका रोमान्टिक गीतहरु गाइदिन्छु
विछोड हुँदा
कसैको यादलाई सितन बनाएर घुटुक्क आफ्नै आँसु पिइदिन्छु
र, आँसुकै क्यानभासमा आफ्नो रून्चे पोट्रेट बनाइदिन्छु
ऊ ‘मकुण्डोधारीहरुको यो जमानामा
जतिबेला पनि मुस्कुराइरहेको मकुन्डो पहिरेर हिंड’ भनिरहन्छ
बारबार मलाई प्राकृत हुनबाट रोकिरहन्छ ।
म जराप्रेमी
हाँगामा एउटा पात नहुँदा पनि
जराको गीतमा मनमगन नृत्य गर्ने मान्छे !
ऊ हाँगामा नक्कली प्लास्टिकका पातहरु गाँसेर भए पनि
जङ्गलमा राज गर्न कुनै कसर छोड्न हुन्न भन्छ
ऊ क्रूरताको आर्किटेक्चर
मेरो कोमलपनलाई फगत कमजोरीको संज्ञा दिन्छ ।
म मायाको कुरा गर्छु
ऊ मोहको राग अलापी–अलापी मलाई दिग्भ्रमित पारिरहन्छ
म करूणाको कुरा गर्छु
ऊ वासनाको तीनपाने प्याला पिलाएर मलाई
लठ्याइरहन्छ ।
मलाई फसाउन ज–जसले खाडल खने
ती त केटाकेटीले खेल्नका लागि बनाएका खाडलजस्ता हुन् मेरा लागि
मलाई कसैले खाडलमा जाक्न सक्छ भने
मभित्रको ‘म’ ले मात्र जाक्न सक्छ
म कुन र कस्तो खाडलमा फस्छु ?
मभित्रको मान्छेलाई बाहेक अरुलाई थाहा छैन ।
मभित्रै छन् सेता परेवाहरु र परेवाहरुको कलरव पनि
मभित्रै छन् हुँडारहरू र हुँडारहरुको नृशंस गर्जन पनि ।
मभित्रको विश्वयुद्धमा
म आफैं यो पक्षको पनि हुँ र त्यो पक्षको पनि
यो दुईधारे हतियार–दुईधारे कटान
म आफैं यताको पनि हतियार हुँ र उताको पनि ।
वर्षौंदेखि म मेरो सबैभन्दा ठूलो शत्रुसित लडिरहेछु
अर्थात् म आफैंभित्रको अर्को कुरुप मान्छेसित लडिरहेछु ।
मान्छेको सबैभन्दा ठूलो शत्रु ऊ आफैंभित्र हुँदोरहेछ
जसले आफैंभित्रको शत्रुलाई जित्यो,
उसले जित्न बाँकी केही रहँदैन रहेछ ।
प्रकाशित : श्रावण ६, २०८० ०७:५१