चराले जस्तै हेर्दा (फोटोफिचरसहित)

यात्रीहरू भन्छन्, यात्रा गर्नका लागि नेपाल सबभन्दा राम्रो देश हो। हिँडेर, गुडेर र उडेर-तपाईं जसरी पनि यात्रा गर्न सक्नुहुन्छ। र, नेपालको भौगोलिक तथा जैविक विविधताका दृश्यको मजा लिन सक्नुहुन्छ।
कुन स्थान घुम्ने? केचाहिँ दृश्य हेर्ने? ६ हजार मिटरभन्दा माथिकै सयभन्दा बढी चुचुरा छन्। ८ वटा त ८ हजार मिटरभन्दा अग्ला छन्, विश्वकै अग्लो सगरमाथासहित। ५ हजारभन्दा बढी ताल छन्। संसारकै सबभन्दा उचाइमा रहेको तिलिचोदेखि मनमोहक रारासम्म। करिब ९ सयथरी चरा छन्। वनस्पति र अन्य जनावर पनि उत्ति नै।
यी सबै दृश्यापानका लागि कम्ती समय लाग्दैन। छोटोमै घुम्ने एउटा उपाय छ हवाई यात्राको। यस्तो यात्रामा हिमाल, पहाड र तराईदेखि खोलानाला, ताल र जंगलसम्म, गाउँदेखि सहरसम्म र मन्दिरदेखि गुम्बासम्मको दृश्यावलोकन गर्न सकिन्छ। साथ दिनुपर्छ त केवल मौसमले। हिमाल हेर्न विभिन्न आन्तरिक विमान सेवाले दिने 'माउन्टेन फ्लाइट' सेवा पर्याप्त छ। एक घन्टा जति उड्दा प्रायः सबै चुचुरा देख्न सकिन्छ।
वर्षौं लगाएर पनि देख्न र घुम्न नसकिने स्थानहरू क्यामेरामा कैद गर्न केही मिनेट, केही घन्टा र केही दिन मात्र लाग्छ, हवाइजहाज यात्रामा। जमिनबाट देख्न नसकिने कति चीजहरू हवाइजहाज, हेलिकप्टर र प्यराग्लाइडिङबाट हेर्दा छर्लङ्ग हुन्छ। काठमाडौं-पोखरा उडानका क्रममा देखिने तालहरू, काठमाडौं-विराटनगर र काठमाडौं-नेपालगन्ज उड्दा देखिने सहर, गाउँ, जंगल, नदीनाला र हिमालहरू मनै बहलाउने गरी देखिन्छ। नेपालगन्ज वा सुर्खेतबाट कणर्ालीका जिल्लातर्फ उड्दा निलो डोरीजस्तो लमतन्न परेको कणर्ालीको डिलमा कोरिएको धर्सोजस्तो बाटोले आङ नै सिरिङ बनाउँछ।
चराले उड्दाखेरी जे-जति देख्छ, त्यति नै जस्तो दृश्यपान गर्न सकिन्छ यस्ता 'एरियल भ्यू' हरूमा। 'बर्ड्स आई भ्यू' पनि भनिने यी दृश्यहरू केही वर्षयता खिचिएका हुन्।

प्रकाशित : पुस ५, २०७१ १५:५०