संकटग्रस्त बनेको क्रेडिट स्वीस बैंकलाई यूबीएसले किन्यो
काठमाडौँ — संकटग्रस्त बनेको क्रेडिट स्वीस बैंकलाई युनियन बैंक अफ स्वीट्जरल्याण्ड (यूबीएस)ले खरिद गर्ने सम्झौता गरेको छ । यूबीएसले स्वीस बैंकलाई ३ अर्ब स्वीस फ्र्यांक (३ अर्ब २५ करोड अमेरिकी डलर) मा खरिदको सम्झौता गरेको हो । १६७ वर्ष पुरानो स्वीस बैंकले समयमै तरलताको व्यवस्थापन गर्न नसक्दा संकटग्रस्त बनेको थियो ।
तरलता व्यवस्थापनका लागि स्वीस बैंकले यसअघि आफ्नो मुख्य लगानीकर्ता साउदी नेसनल बैंकसँग थप आर्थिक सहायता माग गरेको थियो । तर साउदी नेसनल बैंकले थप सहायता प्रदान गर्न नसक्ने बताएपछि संकटग्रस्त बनेको बैंक अन्ततः यूबीएसले खरिद गर्ने भएको हो । साउदी नेसनलले स्वीस बैंकको ९.९ प्रतिशत सेयर स्वामित्व ग्रहण गर्दथ्यो ।
साउदीले प्रतिसेयर ३.८२ स्वीस फ्र्यांक (४.१२ अमेरिकी डलर)का दरले सेयर खरिद गरेको थियो तर अब यूबीएसले बैंकको सेयर प्रतिकित्ता ०.७६ फ्र्यांक (०.८२ अमेरिकी डलर)का दरले खरिद गरेको छ । साउदी नेसनल बैंकले क्रेडिट स्वीसमा भएको लगानीवापत ८० प्रतिशत नोक्सानी ब्यहोरेको जनाएको छ । साउदी नेसनल बैंकका अध्यक्ष अम्मार अल खुदियारीले आतंक सिर्जना गराई बैंकमाथि षडयन्त्र गरिएको प्रतिक्रिया दिएका छन् ।
अन्तर्राष्ट्रिय सञ्चारमाध्यम सीएनबीसीसँग उनले भनेका छन् ‘एउटा आतंक सिर्जना गरी अनुचित कार्य गरियो, यसप्रति मेरो आपत्ति रहन्छ ।’ यूबीएसको खरिदबाट मात्रै बैंकिङ प्रणालीमा स्थायित्व नहुने भएकाले प्रणालीगत जोखिम कायमै रहने स्वीसका अधिकारीहरुले प्रतिक्रिया दिएका छन् । त्यसअघि अमेरिकाका दुई बैंक सिलिकन भ्याली र सिग्नेचर बैंक पनि तरलता समस्याका कारण बन्द हुन पुगेका थिए । त्यहीं घटनाक्रमको आफूहरूलाई सबैभन्दा ठूलाे असर परेको क्रेडिट सुइसका अध्यक्ष एक्सेल लेहम्यानले बताएका छन् ।
