चिम्टेश्वरबाट चियाउँदा...[तस्बिरहरू]

टावर र चिम्टेश्वर महादेव वरिपरि सल्ला र खर्सुको जंगल छ । हालै आगलागी भएकाले वरिपरि घाँसपात डढेको छ । यहींबाट पूर्व, उत्तर र पश्चिमभेगमा लहरै गौरीशंकर, दोर्जे ल्हाक्पा, लाङटाङ, साञ्जेन, गणेश, मनास्लु, अन्नपूर्ण, चीनको केरुङ क्षेत्रका लस्करै दर्जन हिमालहरु देखिन्छ । त्यसैगरी पूर्वीभेगमा काठमाडौं उपत्यका, ककनी, शिवपुरी, दक्षिणीभेग धादिङका बेंसीं र डाँडाहरु, मकवानपुरकाडाँडा, पश्चिममा नुवाकोट झिल्टुङ, उत्तरी भेग हिमालबाहेक रसुवाका ३ वटा पालिका देखिन्छ । त्यसैगरी यहाँबाट त्रिशूली बजार, विदुर, बट्टार, पिपलटार फाँट देखिन्छ । ‘तुवाँलो लागेन भने हिमालदेखि वरिपरिका फाँटहरु मनमोहक देखिने बेलकोटगढी नगरपालिका-९ का सूर्य तामाङले बताए । पहिलो पटक चिम्टेश्वर पुगेका एक नेपाली पर्यटकले भने,‘यो त चन्द्रगिरिलाई माथ गर्ने ठाउँ रहेछ ।’

पछिल्लो समय साना गाडीहरु चिम्टेश्वरसम्म पुग्ने भएकाले वनभोज खाने, रमाइलो गर्ने र महादेवको दर्शन गर्नेको भीड लाग्ने गरेको बेलकोटगढी नगरपालिका-३ का जयराम पुडासैनीले बताए । चिम्टेश्वरको उत्पत्ति र राजा पृथ्वीनारायण शाहको नेपाल एकीकरणसँग जोडिएको स्थानीयको भनाइ छ ।

स्वस्थानीमा वर्णन भएअनुसार स्थानीयले चिर्केश्वर भनेर पूजा गर्छन् । सत्यदेवीको चिर (मुटु छेउको भाग) पतन भएकोले चिर्केश्वर हुँदै चिम्टेश्वर भएको स्थानीय पुडासैनीले सुनाए । अर्को देव र दानवले समुद्रमन्थन गर्दा निष्केको कालकुट विष भगवान शिवले पिएर यही ठाउँमा रात बास बसेको र बिहान कुखुरा कराएपछि उनी छिम्टा बिर्सेर गोसाइँकुण्डतर्फ गएको किंबदन्ती छ ।

त्यसैगरी पृथ्वीनारायण शाहलाई सपनामा गुरु गोरखनाथले शक्तिशाली मठ चिर्केश्वरमा गएर पूजा गर्नाले शक्ति मिल्ने बताएपछि यही ठाउँमा पूजा गरेको बताइन्छ । यहाँ वस्तुभाउ नब्याएमा, सन्तान प्राप्ति र विजयका लागि भाकल तथा शक्ति माग्न भक्तजन आउने गरेको पुडासैनीले बताए । यहाँ पुरानो इँटा, झिंगटीका टुक्रा र काटेका ढुंगाहरु भेटिन्छन् भने हाल टावर रहेको स्थानमा गढी र बंकर बनाएर सेना राखेको बताइन्छ ।

पूर्वीभेगबाट खुट्किला सहितको बाटो निर्माण गरिएको छ । काठमाडौंबाट पश्चिमभेग बागमारासम्म बस संचालन हुन्छ । त्यसपछि सानो गाडी कच्चीबाटो जंगल हुँदै चिम्टेश्वर पुगिन्छ । पूर्वीभेगबाट ३ वडाको झ्याङलीपोखरीसम्म बस आउँछ । यो चिम्टेश्वरभन्दा दुई किलोमिटर तल छ । यो काठमाडौंदेखि ४८ किमि दुरीमा रहेको छ । २२ सय मिटर उचाईमा रहेको यो स्थान बाहृय र आन्तरिक पर्यटनका लागि उत्कृष्ट गन्तव्य हुने सम्भावना छ ।