रवि लामिछानेलाई संसद्मा बोल्न दिने कांग्रेसको निर्णय
काठमाडौँ — नेपाली कांग्रेसले उपप्रधान एवं गृहमन्त्री रवि लामिछानेलाई आजदेखि सुरु हुन लागेको बजेट अधिवेशनमा बोल्न दिने निर्णय गरेको छ । शुक्रबार बिहान बसेको नेपाली कांग्रेस संसदीय दलको बैठकले लामिछानेलाई गृहमन्त्रीको हैसियतमा नभई रास्वपा सभापतिको रुपमा बोल्न दिने निर्णय गरेको बैठकमा सहभागी एक नेताले जानकारी दिए ।
ती नेताले भने, 'हामीले गृहमन्त्रीलाई बोल्न दिने र बोलिसके पछि छानबिन समिति नबनाए अरु कामकारबाही अगाडि बढाउन नदिने प्रस्ताव बैठकमा पेस गरेका छौं । यही नै पारित हुन्छ ।'
सहकारी ठगी प्रकरणमा संसदीय छानबिन गर्नुपर्ने माग गर्दै आएको कांग्रेसले अघिल्लो अधिवेशनमा लामिछानेलाई रोष्ट्रम प्रयोगमा रोकेको थियो । बजेट अधिवेशनको पहिलो दिन आज प्रतिनिधिसभामा शीर्ष नेताहरुलाई सम्बोधन गर्न दिने सम्भावित कार्यसूची छ ।
प्रकाशित : वैशाख २८, २०८१ ११:२६