मुख्यमन्त्रीलाई 'ठेकी' उपहार

शिरमा ढाका टोपी, शरीरमा कोराको कछाड, साइडमा निलो झोला र खुट्टामा प्लाष्टिकका चप्पल । मुख्यमन्त्री चेतनारायण आचार्यलाई भेटेपछि राउटे अगुवा शाहीले सबैभन्दा पहिले काठको 'ठेकी' उपहार दिए, र राउटेका लागि दसैँ खर्च व्यवस्था गरिदिन माग गरे । ठेकी बनाउने पेशा राउटेहरूको आम्दानीको प्रमुख स्रोतमध्येको एक हो । मुख्यमन्त्रीलाई उपहारमा दिएको ठेकी शाही आफैँले बनाएका हुन् ।

‘मुख्यमन्त्रीज्यू, यो काठको कोशी तपाईलाई उपहार । मेरै हातले बनाएको,’ शाहीले भने, ‘दसैँ आईहाल्यो त, खै हामीलाई खर्च चाहियो, दसैँ मनाउनै परो ।’ कोसीमा पानी, दही, मही, अरु सामान जे पनि राख्न मिल्ने उनले बताए ।

गतवर्ष दसैँ खर्च जुटाउन चार जना देउखुरी आइपुगेका थिए । तर यसवर्ष भने शाही एक्लै परे । ‘साथीहरु आउन खोजेका थिए । फेरि गाडी चढेर आउने भएपछि उनीहरू डराए, मरे मै मरुला भनेर म त आईहालें,' उनले भने ।

राउटे समुदायका व्यक्तिलाई सरकारले सामाजिक सुरक्षा भत्ता दिंदै आएको छ । उनीहरुले पनि मासिक चार हजार रुपैंयाँ सामाजिक सुरक्षा भत्ता पाउने गर्छन् । तर, दसैँ भत्ताका लागि प्रधानमन्त्री कार्यालयदेखि प्रदेश सरकारसम्म पुग्ने गरेका छन् ।

गत वर्ष प्रदेश सरकारले राउटेहरुलाई दसैँ खर्च बापत २५ हजार रुपैयाँ दिएको थियो । यसवर्ष १० हजार रुपैयाँ दिएर पठाएको मुख्यमन्त्री कार्यालयलको सचिवालयले जनाएको छ ।

मुख्यमन्त्री आचार्यले सबै राउटे समुदायलाई खुशीसाथ दसैँ मनाउन शाहीमार्फत शुभकामना सन्देश पनि पठाएको मुख्यमन्त्रीका प्रेश संयोजक दशरथ घिमिरेले बताए ।