![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/ekantipur900x100-3082024084948.gif)
काठमाडौँ — हिमालयन फुटबल क्लब र गानादा एडुकेसनल कन्सल्टेन्सीको संयुक्त आयोजनामा राजधानीमा 'हिमालयन गानादा फुटसल गोल्ड कप २०८१' आयोजना हुने भएको छ ।
![](https://assets-cdn.ekantipur.com/uploads/source/ads/comp-900x100-1672024010950.gif)
बुधबार त्रिपुरेश्वरस्थित नेपाल खेलकुद पत्रकार मञ्चको हलमा आयोजित पत्रकार सम्मेलनका बीच आयोजक संस्थाले प्रतियोगिताको ट्रफी अनावरण पनि गर्यो ।
यही भदौ २० र २१ गते आयोजना हुने प्रतियोगिताका सबै खेल चावहिल चुच्चेपाटी स्थित भाटभटेनी हेल्थ क्लबमा सञ्चालन हुनेछन् । फुटबल प्रतियोगिताको नाममा गोल्डकप धेरै हुँदै आइरहेको भए पनि फुटसलमा पहिलो पटक गोल्डकप आयोजना गर्न लागिएको दाबी आयोजकको छ ।
प्रतियोगितामा ३२ भन्दा बढी टिमहरुले सहभागिता जनाउने आयोजकको अपेक्षा छ । भदौ १५ गतेसम्म टिम दर्ताको समयसीमा रहँदा सहभागी शुल्क १२ हजार तोकिएको छ । प्रतियोगिताभर ४ हजार दर्शकले अवलोकन गर्ने विश्वास आयोजकले लिएको छ ।
खुल्ला प्रतियोगिता भएकोले सबै खेलाडी र टिमले सहभागिता जनाउन सकिने हिमालयन फुटबल क्लबका अध्यक्ष विनोद कार्कीले बताए । प्रतियोगिताको विजेताले नगद २ लाख र उपविजेताले १ लाख प्राप्त गर्नेछन् । फेयर प्ले टिमले २० हजार तथा उत्कृष्ट खेलाडी र उत्कृष्ट गोलकिपरले समान १० हजार प्राप्त गर्नेछन् ।
पछिल्लो समय फुटसलमा बढ्दो आकर्षणसँगै यो खेलको विकासमा केहि सहयोग होस् र खेलाडीको क्षमता अभिवृद्धिमा सहयोग पुगोस् भनेर यो प्रतियोगिता आयोजना गर्न लागिएको क्लबमा सचिव विधा दंगालले बताए । यस प्रतियोगिताले खेलकुद र फुटसल क्षेत्रमा योगदान पुर्याउनुका साथै नयाँ खेलाडीहरुको प्रतिभा पहिचानमा महत्त्वपूर्ण भूमिका खेल्ने आयोजकले जनाएको छ ।
नकआउट फर्म्याटमा चल्ने प्रतियोगिताका हरेक खेल पहिलो र दोस्रो हाफ १०-१० मिनेटको रहनेछन् । प्रतियोगितामा भाग लिन आउने उपत्यका बाहिरका टिमलाई सहुलियतको व्यवस्था गरिने समेत कार्कीले बताए ।
![](https://assets-cdn.ekantipur.com/uploads/source/ads/900-x-100-1-0282024055738.gif)