लुम्बिनी प्रादेशिक अस्पतालको मेसुमा ढकाल यथावत

सरकारको नियुक्तिविरुद्धमा अस्पतालमै कार्यरत ११ औं तहका डा विष्णु गौतम सर्वोच्च अदालत पुगेपछि गत असार १७ गते सर्वोच्च अदालतले तत्काल मेसुको काम नगर्न अल्पकालीन अन्तरिम आदेश दिएको थियो ।

सर्वोच्च अदालतको आइतबारको फैसलाले डा गौतमले दायर गरेको रिट खारेज गरिदिएपछि डा ढकाल पुनः मेडिकल सुपरिटेण्डेन्टमा कायम भएका हुन् । अस्पताल प्रशासनका अनुसार सर्वोच्च अदालतका न्यायाधीश हरि फुयाँल र अब्दुल अजिज मुसलमानको इजलासले फैसलाले डा गौतमको रिट खारेज गर्दै निर्देशनात्मक आदेश दिएको छ ।

मेसु नियुक्त डा ढकाल १० औं तहका हुन् । डा गौतम ११ औं तहका हुन् । मेसुका लागि ११ औं तह आवश्यक पर्ने र उक्त पदमा आफू कार्यरत रहँदा-रहँदै १० औं तहको डाक्टर मेसु नियुक्त हुन नसक्ने जिकिर डा गौतमको थियो । तर, सरकारको निर्णयलाई कार्यान्वयन गर्न आइतबारको फैसलाले निर्देशनात्मक आदेश दिंदै डा गौतमको रिट खारेज गरेको अस्पतालले जनाएको छ ।

लुम्बिनी प्रदेशकै सबैभन्दा बढी भिड लाग्ने अस्पतालमा तीन महिनादेखि मेसु नहुँदा प्रशासनका नियमित काम, आर्थिक प्रशासन लगायतका काम प्रभावित हुँदै आएका थिए ।