लुम्बिनीको निजामती सेवा ऐन संशोधन विधेयक प्रदेश सभामा पेस

बैठकमा संशोधन विधेयकमाथि दफावार छलफलका लागि भौतिक पूर्वाधार विकास मन्त्री भूमिश्वर ढकालले प्रस्ताव गरेका थिए । सभामुख तुलाराम घर्तीले निर्णयार्थ प्रस्तुत गरेको विधेयकलाई प्रदेश मामिला तथा कानुन समितिमा दफावार छलफलका लागि पठाउने प्रस्ताव सर्वसम्मतले पारित भएको थियो ।

स्रोतका अनुसार सोमबार प्रतिवेदनसहितको विधेयक प्रदेश सभामा छलफलका लागि पेस गर्ने तयारी छ । प्रदेश सभाबाट ऐन बनेको ठिक एक वर्षपछि सरकारले त्यसलाई संशोधन गर्ने तयारी गरेको हो । प्रदेश निजामती सेवाको गठन, सञ्चालन र सेवाको सर्त सम्बन्धमा व्यवस्था गर्न बनेको ऐनलाई संशोधन गर्न बनेको विधेयक प्रदेश सभामा पेस गर्ने निर्णय लुम्बिनी मन्त्रिपरिषद‌्को गत सोमबारको बैठकले पारित गरेको थियो ।

२०८० असार २२ गते सरकारले निजामती विधेयक पेस गरेको थियो । विषयगत समितिको छलफल र सरोकारवालाको सुझावसहितको प्रतिवेदनलाई प्रदेश सभाले २०८० भदौ २२ गते पारित गरेको थियो । प्रदेश सभाबाट पारित भएको तीन महिनापछि प्रदेश प्रमुख अमिक शेरचनले मंसिर २१ गते प्रमाणीकरण गरेका थिए । सरकारले सरोकारवालाको सुझावसहित विधेयक पारित गरे पनि त्यसमा उल्लेखित केही दफा र उपदफाको विषयमा कर्मचारी संघ, संगठन र समूहहरूले विरोध गर्दै आएका थिए ।

सोमबारको प्रदेश सभाको बैठकको विशेष समयमा प्रदेश सभा सदस्यहरूले प्रदेश सरकारले अघि सारेको ५ लाख भन्दा माथिका आयोजनाहरू ठेक्का प्रक्रियाबाट मात्र निर्माण गर्ने निर्णय अपरिपक्व भएको भन्दै निर्णय सच्याउन आग्रह गरेका थिए । त्यस्तै विभिन्न विषयमा सरकारको ध्यानाकर्षण गराएका थिए । प्रदेश सभाको अर्को बैठक सोमबार दिउँसो १ बजे बस्नेछ ।