मिटरब्याजपीडितहरूद्वारा जिल्ला अदालत परिसरमा प्रदर्शन

पीडितहरुको लिखित उजुरीका आधारमा प्रहरीले पक्राउ गरेर अनुसन्धानपछि अदालतमा बुझाए पनि मिटरब्याजी अमृत भुसालको मुद्दा दर्ता समेत नगरी छोडेको भन्दै पीडितहरुले जिल्ला अदालत र सरकारी वकिलको कार्यालय अघिल्तिर बिहीबार प्रर्दशन गरेका हुन्।

मिटरब्याजपीडित संघर्ष समितिले ब्यानरसहित प्रर्दशन गरेको हो ।उनीहरूले भ्रष्टाचार गर्न पाइदैन, दोषीलाई छोड्न पाइदैन । सामाजिक एकता जिन्दावाद लेखिएका ब्यानर बोकेका थिए ।

प्रहरीमा प्रमाणसहित किटानी जाहेरी दिएपछि पक्राउ परेका कावासोतीका मिटरब्याजी साहु अमृत भुसालको मुद्दामा अदालतले सही न्याय निसाप नगरेको उनीहरूको गुनासो छ । कावासोती नगरपालिका-२ निवासी भुसालले रामप्रसाद महतोलाई ३६ पटक पटक गरेर ३६ लाख ऋण दिएका थिए ।

त्यसवापत महतोले २ करोड भन्दा बढी रकम तिरी सक्दापनि कर्जा चुक्ता नभएको भन्दै प्रमाणसहित जिल्ला प्रहरी कार्यालयमा निवेदन दिएका थिए । महतोको निवेदनका आधारमा प्रहरीले भुसाललाई २४ दिन नियन्त्रणमा राखेर मुद्दा सरकारी वकिलको कार्यालयमा बुझाएको थियो ।

सरकारी वकिलको कार्यालयले मुद्दा दर्ता समेत नगरी भुसाललाई रिहा गरेको थियो । त्यसैका विरुद्ध प्रर्दशन गर्न परेको महतोले जानकारी दिए । भुसाल दुई साताअघि रिहा भएका हुन् । महतोले भुसालविरुद्ध साउन पहिलो साता जिल्ला प्रहरी कार्यालयमा निवेदन दिएका थिए ।

२०७६ साल जेठमा रामप्रसाद महतोले व्यापार गर्न भनेर भुसालसँग दैनिक १५ हजार ब्याज तिर्ने गरी १५ लाख लिएको कागजातले देखाउँछ । त्यसवापत महतोको मध्यबिन्दु नगरपालिका-२ मा रहेको ४ कठ्ठा ६ धुर जग्गा भुसाललाई पास दिएका थिए ।

नगद र जग्गा समेत गरेर २ करोड भन्दा बढी रकम भुक्तानी गर्दा समेत भुसालले जग्गा फिर्ता नगरेको महतोको भनाई छ । महतो लगायत आधा दर्जन स्थानीयलाई भुसालले मिटरब्याजमा पैसा लगानी गर्दै असुली गर्दै आएको प्रहरीको भनाई छ ।

पूर्वी नवलपरासीका प्रहरी प्रमुख नरहरी रेग्मीले मिटरब्याजी भुसालले महतोबाट बिभिन्न समयमा चक्रवर्ती ब्याज र साँवामा समेत गरेर १ करोड ५७ लाख १५ हजार ४ सय ११ रुपैयाँ असुलेको प्रमाण सहित जिल्ला सरकारी वकिलको कार्यालयमा कागजात बुझाउँदा भुसालको मुद्दा दर्ता समेत गर्न नमानेको जानकारी दिए ।

भुसालविरुद्ध मुद्धा दर्ता नगरेपछि मिटर ब्याज पीडितहरुले बिहिवार जिल्ला अदालत र सरकारी वकिलको कार्यालय विरुद्ध प्रर्दशन गरेको जानकारी दिए ।