गगनलाई छेउ लगाउने बाटो

यो प्रस्तावको किनारा लागेसँगै थापाको प्रतिवेदन अब कांग्रेस पार्टीको प्रस्ताव बनेको छ । थापाले प्रतिवेदनमा समावेश गरेको गठबन्धन भन्ने शब्दलाई हटाएर अझै पनि परिआएको खण्डमा अन्य दलसँग गठबन्धन गर्न सकिने भन्ने बाटो राखेको पाइन्छ । गठबन्धन भन्ने शब्दलाई कांग्रेसले सहर्ष स्वीकार गर्न नसक्नुले नै यसलाई पुष्टि गर्छ । यदि कांग्रेसजनमा एक्लै निर्वाचन लडेर बहुमत ल्याउन सकिन्छ भन्ने आँट भएको थियो भने थापाको प्रस्ताव आजसम्म गिजोलिने नै थिएन ।

महासमिति बैठकबाटै यसको छिनोफानो हुने थियो । पार्टीको बैठकबाट पारित भइसकेको प्रस्तावलाई अझै पनि संस्थापन पक्षधर नेताहरूले सहजै स्वीकार गर्न सकेको पाइँदैन, उनीहरू यसको पक्षमा अझै पनि खुलस्त भएर आउन सकेका छैनन् । यसर्थ थापाको उक्त प्रतिवेदनमा प्रयोग भएको भाषालाई परिमार्जन गर्नु भनेको चुनावी गठबन्धनको बाटो खुलै राखेर थापालाई छेउ लगाउने उपाय हो भनेर बुझ्न सकिन्छ ।
– सुजन देवकोटा, पालुङ्टार, गोरखा