फ्रिडमलाई भेट्रान्स उपाधि

पिप्लेक्याम्पा रंगशालामा फाइनलको तेस्रो मिनेटमै नीलेन्द्र देवानको गोलबाट फ्रिडमले अग्रता बनायो । उनैले २० औं मिनेटमा गोल थप्दै अग्रता दोब्बर बनाए । टोलीका लागि ३७ औं मिनेटमा विकर्ण श्रेष्ठले तेस्रो गोल थपे । त्यसपछि पूर्वेलीले दोस्रो हाफमा दुई गोल गर्दै खेलमा फर्किने सम्भावना देखाए पनि अन्ततः उपविजेतामै चित्त बुझायो । पूर्वेलीका मित्र बस्नेतले ४० औं र रमेश गुरुङले ४३ औं मिनेटमा गोल गरेका थिए ।

सर्वोत्कृष्ट खेलाडी र म्यान अफ द म्याच नीलेन्द्र देवान चुनिए । उत्कृष्ट स्ट्राइकर विकर्ण श्रेष्ठ, मिडफिल्डर राजु तामाङ, डिफेन्डर राजकुमार घिसिङ, गोलरक्षक सञ्जिव खड्गी र प्रशिक्षक सुरज श्रेष्ठ चुनिए । सर्वोत्कृष्ट खेलाडीले १० हजार र विधागत उत्कृष्टले ५ हजार रुपैयाँ पाए ।

पिप्ले युवा क्लबको सहआयोजना एवं रोटर्‍याक्ट क्लब अफ मकवानपुरको सहकार्यमा भएको भेट्रान्स फुटबलमा १५ टिमको सहभागिता थियो । पहिलो र दोस्रो संस्करण चितवन भेट्रान्सले जितेको थियो । विजेता खेलाडीलाई रोटरीका अध्यक्ष अनिल अग्रवाल, वाग्मती प्रदेश खेलकुद विकास परिषद्का सदस्यसचिव दीपक लामालगायतले पुरस्कृत गरे ।