जापानको अध्यागमनबाट फकाईए नेपाली फेन्सर

नागोया एयरपोर्ट पुगेपछि उनलाई अध्यागमनले सोधपुछ गरेको थियो । त्यसक्रममा उनी प्रशिक्षण गर्न लागेको केयर फेन्सिङ एकेडेमी र उनलाई प्रायोजन गरेका भुवन हुमागाईंसँग अध्यागमनले फोनमा सोधपुछ गरेको भीष्मराजले जनाए ।

भीष्मराजले दुई वर्षअघि इजिप्टको कायरोमा भएको विश्व फेन्सिङ च्याम्पियनसिप खेलेका थिए । असारमा नेपाल फेन्सिङ संघद्वारा आयोजित छैटौं राष्ट्रिय फेन्सिङ च्याम्पियनसिप र दुई वर्षअघि पोखरामा सम्पन्न नवौं राष्ट्रिय खेलकुदमा उनले इपी विधामा कांस्य पदक जितेका थिए ।

‘नागोया अध्यागमनले तिमी यो स्तरको खेलाडी हो भने संघले लेखेको यो पत्रले जापान छिर्न मिल्दैन भन्यो । त्यति धेरै सम्भावना भएका खेलाडी हो भने यतिमात्र कागजपत्रले पुग्दैन भनेर मलाई जापान छिर्नबाट रोकेको थियो,’ नेपाल फेन्सिङ संघले कागजपत्रमा सहजीकरण नगरिदिएको आशय बुझेर नेपाल फर्किएका उनले सुनाए । उनलाई झन्डै २४ घन्टा अध्यागमनको निगरानीमा राखिएको थियो । एयरपोर्टभित्रै बस्ने र सुत्ने व्यवस्था मिलाइदिए पनि खाना दिइएको थिएन । अध्यागमनले फर्काइदिएका भीष्मराज सोमबार राति काठमाडौं आइपुगेका छन् ।

उनलाई प्रायोजन गरेका हुमागाईले भिसा दिएर पनि जापानभित्र प्रवेश गर्न नपाउने यो निकै दुर्लभ केस भएको जनाए । तीन महिना प्रशिक्षण गरेवापत उनले १ लाख ४५ हजार शुल्क तिर्नुपर्ने थियो । व्यक्तिगत खर्च र आफ्नै पहलमा जान लागेका उनले त्यसका लागि झन्डै २ लाख रुपैयाँ साथमा लगेका थिए । तर अध्यागमनले त्यो रकम पर्याप्त नभएको र बलियो आधार भएको कागजपत्र नरहेकाले फर्काइदिएको भीष्मको दाबी छ ।

उनी व्यक्तिगत पहल र रकम आफैंले जोहो गरेर जापान गएका थिए । फेन्सिङ संघ, नेपाल ओलम्पिक कमिटी र राष्ट्रिय खेलकुद परिषदले उनलाई भिसा सहजीकरणका लागि पत्र लेखिदिएका थिए । तर, उनलाई जापान आतेजाते र त्यहाँ बस्दा लाग्ने खर्चबारे पत्र नलेखिदिएका कारण आफू जापानमा प्रशिक्षण लिन वञ्चित भएको भीष्मको गुनासो छ ।

उनले ३ वर्षदेखि फेन्सिङ खेल्न लागेका हुन् । त्यो अगाडि उनी तेक्वान्दो खेल्थे । लिगामेन्टमा लागेको चोटका कारण उनी खेल परिवर्तन गर्न बाध्य भए । तेक्वान्दोमा पुनरागमन हुने सम्भावना नदेखेपछि उनी खेलमोह त्याग्न नसकेर फेन्सिङमा लागेका थिए । १३ वर्ष खेल्नेक्रममा उनी तेक्वान्दोमा चौथो डान भएका थिए ।

जापानमा प्रशिक्षण लिन जाने विषयमा उनले पछिल्लो डेढ वर्षदेखि फेन्सिङ संघका अध्यक्ष सुनिल श्रेष्ठ र महासचिव सुजन श्रेष्ठसँग सल्लाह गर्दै आएका थिए । ८ महिना अगाडिदेखि आफूले कागजी प्रकृया अगाडि बढाउँदै आएको उनी बताउँछन् । यस विषयमा अध्यक्ष र महासचिवसँग सम्पर्क गर्दा उनीहरू विदेशमा रहेकाले सम्पर्क हुन सकेन ।

उनलाई नागोयामा निसियामा तोमोनोसिनले प्रशिक्षण दिने तालिका थियो । अहिले संघले आफूलाई किनारा लगाउन खोजेको हो कि के हो बुझ्न नसकेको उनी सुनाउँछन् । ‘जापानको प्रशिक्षणमात्र सबै होइन, २०२६ को एसियाली खेलकुदअगाडि विभिन्न देशमा गएर प्रशिक्षण गर्ने मेरो लक्ष्य यथावत छ, त्यसका लागि प्रायोजकहरू पनि म आफैं खोज्छु,’ संघले त्यसअनुसार विश्वासको वातावरण बनाइदिनुपर्ने भीष्मराजको दाबी छ ।